रतनगंजातील श्री गोंड बाबा मंदिरात चैत्र नवरात्र उत्सव उत्साहात; पारंपरिक ‘जवारे उठवणे’ ठरले आकर्षण

अमरावती (प्रतिनिधी):
अमरावती शहरातील रतनगंज परिसरातील श्री गोंड बाबा मंदिर येथे चैत्र नवरात्र उत्सव मोठ्या भक्तिभावात आणि उत्साहात साजरा करण्यात आला. प्राचीन आणि जागृत देवस्थान म्हणून ओळखल्या जाणाऱ्या या मंदिरात दरवर्षीप्रमाणे यंदाही नवरात्रोत्सवाला भाविकांचा मोठा प्रतिसाद मिळाला.

नवरात्रीच्या नऊ दिवसांत भक्तांनी देवीची मनोभावे पूजा-अर्चा केली. मंदिरात भजन-कीर्तन, धार्मिक कार्यक्रम आणि विविध पूजा विधींचे आयोजन करण्यात आले होते. या काळात मंदिर परिसर भक्तिमय वातावरणाने भारून गेला होता.

नवरात्रीच्या नवव्या दिवशी ‘जवारे उठवणे’ ही पारंपरिक प्रथा विशेष आकर्षण ठरली. या वेळी अनेक भक्तांनी मोठ्या श्रद्धेने सहभाग घेतला. काही भाविकांनी लोखंडी सांग (सुळे) शरीरात, विशेषतः तोंडात टोचून आपली श्रद्धा व्यक्त केली. अनेक पिढ्यांपासून चालत आलेली ही परंपरा आजही तितक्याच श्रद्धेने जपली जात आहे.

दरम्यान, अमरावतीतील बिजासन माता मंदिर, चेतन दास मंदिर तसेच बजरंग टेकडीवरील शितला माता मंदिर येथेही चैत्र नवरात्र उत्सव भक्तिभावात साजरा करण्यात आला. नऊ दिवसांच्या पूजेनंतर पारंपरिक पद्धतीने जवारे नदीमध्ये विसर्जित करण्यात आले.

एकूणच, अमरावतीतील या प्राचीन मंदिरांमध्ये साजरा झालेला नवरात्र उत्सव हा भक्ती, श्रद्धा आणि परंपरेचा अनोखा संगम ठरला.