धारणी शहरात पाणीटंचाईचा गंभीर कहर; कोट्यवधींच्या योजनांनंतरही नागरिकांना पाण्यासाठी भटकंती, कर्मचाऱ्यांचे वेतन थकीत
धारणी (मेळघाट), प्रतिनिधी : मेळघाटातील धारणी शहरात पिण्याच्या पाण्याचा प्रश्न दिवसेंदिवस अधिक गंभीर होत चालला आहे. कोट्यवधी रुपये खर्च करूनही पाणीपुरवठा योजनांचा अपेक्षित लाभ नागरिकांपर्यंत पोहोचत नसल्याने तीव्र असंतोष निर्माण झाला आहे. दुसरीकडे, पाणीपुरवठा आणि स्वच्छता व्यवस्थेत कार्यरत कर्मचाऱ्यांना गेल्या चार ते आठ महिन्यांपासून वेतन मिळाले नसल्याने त्यांनी कामबंद आंदोलनाचा इशारा दिला आहे.
शहरात विविध पाणीपुरवठा योजनांवर मोठ्या प्रमाणात निधी खर्च करण्यात आला असला तरी प्रत्यक्षात नागरिकांना नियमित पाणीपुरवठा होत नसल्याचे चित्र आहे. अनेक भागांमध्ये नागरिकांना पिण्याच्या पाण्यासाठी टँकरवर अवलंबून राहावे लागत असून, दैनंदिन जीवन विस्कळीत झाले आहे. पाणीटंचाईमुळे नागरिकांमध्ये संतापाचे वातावरण निर्माण झाले आहे.
याच पार्श्वभूमीवर पाणीपुरवठा आणि घनकचरा व्यवस्थापन विभागातील कर्मचाऱ्यांनी गंभीर आरोप केले आहेत. नगरपंचायतीने संबंधित ठेकेदाराला निधी अदा करूनही कर्मचाऱ्यांचे वेतन थकीत असल्याचा दावा करण्यात आला आहे. काही कर्मचाऱ्यांचे चार, सहा तर काहींचे तब्बल आठ महिन्यांचे वेतन प्रलंबित असल्याचे सांगितले जात आहे.
याशिवाय पीएफ आणि किमान वेतनाच्या अंमलबजावणीबाबतही प्रश्न उपस्थित करण्यात आले आहेत. वारंवार पाठपुरावा करूनही न्याय मिळत नसल्याने कर्मचाऱ्यांमध्ये तीव्र नाराजी असून, त्यांनी कामबंद आंदोलनाचा इशारा दिला आहे. हे आंदोलन प्रत्यक्षात सुरू झाल्यास शहरातील पाणीपुरवठा आणि स्वच्छता व्यवस्था पूर्णपणे ठप्प होण्याची शक्यता व्यक्त केली जात आहे.
दरम्यान, परिस्थिती इतकी गंभीर झाल्याचे चित्र आहे की नगराध्यक्षांच्या निवासस्थानीही टँकरद्वारे पाण्याची व्यवस्था करावी लागत असल्याचे समोर आले आहे. त्यामुळे पाणीटंचाईचे संकट सर्वच स्तरांवर जाणवत असल्याचे स्पष्ट होते.
दुसरीकडे, वॉर्ड क्रमांक ३ मधील भाजप नगरसेवक प्रतीक मालवीय, राजू मालवीय, अर्पण मालवीय आणि सामाजिक कार्यकर्ते कालू मालवीय यांनी पुढाकार घेत नागरिकांना मोफत पाणीपुरवठा सुरू केला आहे. त्यांच्या या उपक्रमाचे नागरिकांकडून स्वागत होत असले तरी नगरपंचायतीच्या मूलभूत जबाबदाऱ्या लोकप्रतिनिधींना पार पाडाव्या लागत असल्याने प्रशासनाच्या कार्यपद्धतीवर प्रश्नचिन्ह निर्माण झाले आहे.
धारणी शहरातील वाढते पाणीटंचाई संकट, कर्मचाऱ्यांचे थकीत वेतन आणि नगरपंचायतीच्या कथित दुर्लक्षामुळे नागरिकांमध्ये तीव्र असंतोष निर्माण झाला आहे. थकीत वेतन तातडीने अदा करून पाणीपुरवठा व स्वच्छता व्यवस्था सुरळीत करण्याची मागणी आता जोर धरू लागली आहे. प्रशासन या गंभीर परिस्थितीवर कोणती भूमिका घेते, याकडे संपूर्ण शहराचे लक्ष लागले आहे.
