नांदेडमध्ये अवकाळी पावसाचा कहर! शेतकऱ्यांचे पिके उद्ध्वस्त; अर्धापूर तालुक्यात सर्वाधिक फटका
नांदेड | प्रतिनिधी
नांदेड जिल्ह्यात मागील दोन दिवसांपासून सुरू असलेल्या अवकाळी पावसाने शेतकऱ्यांचे मोठे नुकसान केले आहे. वादळी वाऱ्यासह झालेल्या मुसळधार पावसामुळे ज्वारी, गहू, मका, हळद आणि आंबा या पिकांचे मोठ्या प्रमाणात नुकसान झाले असून शेतकऱ्यांच्या हातात आलेला घास हिरावला गेला आहे.
गेल्या दोन दिवसांपासून सुरू असलेल्या या पावसामुळे शेतीचे प्रचंड नुकसान झाले आहे. विशेषतः अर्धापूर तालुक्यात या नैसर्गिक आपत्तीचा सर्वाधिक फटका बसल्याचे समोर आले आहे. मालेगाव शिवारात काढणीला आलेली ज्वारी पूर्णपणे जमिनीवर कोसळली असून शेतकऱ्यांच्या हातात काहीच उरलेले नाही.
याशिवाय गहू आणि मका पिकांचेही मोठ्या प्रमाणात नुकसान झाले आहे. काढून ठेवलेली हळद आणि आंबा पिके पावसामुळे खराब झाली आहेत. वादळी वाऱ्यामुळे अनेक ठिकाणी पिके आडवी पडली असून शेतकऱ्यांना मोठा आर्थिक फटका बसला आहे.
या अचानक आलेल्या संकटामुळे शेतकरी हतबल झाले असून शासनाकडून तातडीने पंचनामा करून आर्थिक मदत देण्याची मागणी केली जात आहे. लवकर मदत न मिळाल्यास शेतकऱ्यांवर गंभीर आर्थिक संकट ओढवण्याची भीती व्यक्त केली जात आहे.
अवकाळी पावसामुळे नांदेड जिल्ह्यातील शेती व्यवस्थेवर मोठा परिणाम झाला असून आता प्रशासन या परिस्थितीकडे किती गांभीर्याने पाहते, हे महत्त्वाचे ठरणार आहे.
