नागपुरात भीषण अपघातात बी.टेक.च्या २० वर्षीय विद्यार्थ्याचा मृत्यू; मित्र गंभीर जखमी

गुरुनानक इन्स्टिट्यूटमध्ये द्वितीय वर्षात होता युवराज मोहाडीकर; ॲक्टिव्हावरील प्रवास ठरला अखेरचा

नागपूर : नागपूर शहरात झालेल्या भीषण रस्ते अपघातात बी.टेक.च्या एका तरुण विद्यार्थ्याचा जागीच मृत्यू झाला, तर त्याचा मित्र गंभीर जखमी झाला आहे. युवराज राजेंद्र मोहाडीकर (वय २०, रा. पाचपावली) असे मृत विद्यार्थ्याचे नाव आहे. तो गुरुनानक इन्स्टिट्यूट ऑफ टेक्नॉलॉजी (GNIT) येथे बी.टेक.च्या द्वितीय वर्षात शिक्षण घेत होता.

ॲक्टिव्हावरून जाताना भीषण अपघात

मिळालेल्या माहितीनुसार, युवराज हा त्याचा मित्र आशिष पटेल (रा. जरीपटका) याच्यासोबत ॲक्टिव्हा दुचाकी क्रमांक MH 49 AV 8459 वरून प्रवास करत होता. यावेळी झालेल्या भीषण अपघातात दुचाकीचे मोठे नुकसान झाले. अपघाताची तीव्रता अधिक असल्याने युवराजचा घटनास्थळीच मृत्यू झाला, तर आशिष गंभीर जखमी झाला.

जखमी मित्रावर रुग्णालयात उपचार

घटनेची माहिती मिळताच पोलिसांनी घटनास्थळी धाव घेतली. मृतदेह उत्तरीय तपासणीसाठी पाठविण्यात आला असून जखमी आशिषवर रुग्णालयात उपचार सुरू आहेत.

सामाजिक कार्यकर्त्यांकडून तातडीची मदत

अपघातानंतर देव्यांशी फाउंडेशनच्या रुग्णवाहिकेच्या माध्यमातून सामाजिक व रुग्णसेवक मंगेश गमे, प्रतीक बागडे, रोशन आगरकर आणि ललित डेहरिया यांनी तातडीने मदतकार्य केले. त्यांनी जखमीला रुग्णालयात पोहोचविण्यास सहकार्य केले.

पाचपावली परिसरात शोककळा

अवघ्या २०व्या वर्षी विद्यार्थ्याचा मृत्यू झाल्याने पाचपावली परिसरात आणि विद्यार्थ्यांमध्ये हळहळ व्यक्त केली जात आहे. अपघात नेमका कसा घडला, याबाबत पोलिसांकडून पुढील तपास सुरू आहे.

टिकर : नागपुरात बी.टेक.च्या विद्यार्थ्याचा भीषण अपघातात दुर्दैवी मृत्यू; मित्र गंभीर जखमी, पाचपावली परिसरात शोककळा

सिटी न्यूज | नागपूर