उत्तराखंडमध्ये भीषण अपघात; भाविकांची कार दरीत कोसळली, २ जखमी
उत्तराखंड राज्यातील नैनीताल येथे एक गंभीर अपघात घडला आहे. भाविकांनी भरलेली कार अनियंत्रित होऊन खोल दरीत कोसळल्याने परिसरात एकच खळबळ उडाली. या कारमध्ये एकूण ६ जण प्रवास करत होते.
मिळालेल्या माहितीनुसार, हा अपघात भवाली जवळील निगलाट परिसरात बुधवारी मध्यरात्री सुमारे २ वाजण्याच्या सुमारास घडला. भाविकांची कार अचानक अनियंत्रित झाली आणि थेट दरीत कोसळली. कार दरीत पडताच वाहनातील प्रवाशांमध्ये एकच आरडाओरडा झाला.
कारमधील सर्वजण आग्रा येथील रहिवासी असून कैंची धाम येथे दर्शनासाठी जात होते. सुदैवाने या अपघातात कोणतीही जीवितहानी झाली नाही. मात्र दोन जण गंभीर जखमी झाले असून इतर चार जणांना किरकोळ दुखापत झाली आहे.
घटनेची माहिती मिळताच स्थानिक पोलीस आणि State Disaster Response Force (एसडीआरएफ) पथक तातडीने घटनास्थळी दाखल झाले. स्थानिक नागरिकांच्या मदतीने बचावकार्य राबवत सर्व जखमींना दरीतून बाहेर काढण्यात आले.
जखमींना तातडीने भवाली येथील रुग्णालयात दाखल करण्यात आले. त्यापैकी अजित चौहान आणि अनुप कुमार या दोघांची प्रकृती गंभीर असल्याने पुढील उपचारासाठी उच्चस्तरीय रुग्णालयात हलवण्यात आले आहे. पोलिसांकडून अपघाताचे नेमके कारण शोधण्याचे काम सुरू आहे.
