मुलांच्या वादातून गोळीबार; वडिलांसह दोन भावांना गोळ्या, एकाचा मृत्यू
उत्तर प्रदेशातील सुलतानपूर जिल्ह्यात मुलांच्या किरकोळ वादातून भीषण प्रकार घडला आहे. दोन पक्षांमध्ये झालेल्या मारहाणीनंतर गोळीबार झाला असून यात एकाचा मृत्यू झाला तर दुसरा गंभीर जखमी झाला आहे. या घटनेमुळे परिसरात खळबळ उडाली आहे.
पोलिसांनी दिलेल्या माहितीनुसार, जौनपूर गाव येथे गुरुवारी सायंकाळी दोन नातेवाईक कुटुंबांमध्ये वाद झाला. सकाळी होमगार्ड वीरेंद्र प्रताप सोनकर यांच्या लहान मुलाचा रमेश सोनकर यांच्या कुटुंबीयांशी किरकोळ वाद झाला होता. त्यावेळी दोन्ही पक्षांमध्ये समझोता झाला आणि पोलिसांत कोणतीही तक्रार दाखल करण्यात आली नव्हती.
मात्र संध्याकाळी रमेश सोनकर यांच्या कुटुंबातील महिला आणि त्यांचा मुलगा भोलू सोनकर हे वीरेंद्र प्रताप यांच्या घरी गेले. त्यावेळी पुन्हा वाद चिघळला आणि परिस्थिती हाताबाहेर गेली. आरोप आहे की, भोलू सोनकर याने संतापाच्या भरात सुमारे पाच फेऱ्या गोळीबार केला.
या गोळीबारात मोहित याच्या छातीत दोन गोळ्या लागल्या. त्याला तातडीने जिल्हा रुग्णालयात नेण्यात आले, मात्र उपचारादरम्यान डॉक्टरांनी त्याला मृत घोषित केले. तर मंगल याला देखील एक गोळी लागली असून त्याची प्रकृती गंभीर असल्याने पुढील उपचारासाठी लखनऊ येथील वैद्यकीय महाविद्यालयात हलवण्यात आले आहे.
या घटनेत होमगार्ड वीरेंद्र प्रताप यांनाही किरकोळ दुखापत झाली असून त्यांच्यावर उपचार सुरू आहेत.
दरम्यान, मुख्य आरोपी भोलू सोनकर फरार असून त्याच्या अटकेसाठी पोलिसांनी विशेष पथके तयार केली आहेत. प्रकरणाची गंभीर दखल घेत पोलिसांकडून घटनास्थळाची पाहणी करण्यात येत असून संबंधित कलमान्वये गुन्हा दाखल करून पुढील तपास सुरू आहे.
