सरदार वल्लभभाई पटेल जयंतीनिमित्त धारणीमध्ये ‘रन फॉर युनिटी’चा उत्साह!
पोलीस प्रशासन, नगर पंचायत आणि विद्यार्थ्यांचा उत्स्फूर्त सहभाग; ‘एक भारत, श्रेष्ठ भारत’चा दिला संदेश
सिटी न्यूज | धारणी
देशाचे लोहपुरुष सरदार वल्लभभाई पटेल यांच्या जयंतीनिमित्त धारणी तालुक्यात राष्ट्रीय एकतेचा संदेश देणाऱ्या ‘एकता दौड – रन फॉर युनिटी’ कार्यक्रमाचे उत्साहपूर्ण आयोजन करण्यात आले. धारणी पोलीस स्टेशनच्या वतीने आयोजित या उपक्रमात पोलीस प्रशासन, नगर पंचायत तसेच शालेय विद्यार्थ्यांनी मोठ्या उत्साहाने सहभाग नोंदविला. या दौडीच्या माध्यमातून राष्ट्रीय एकता, अखंडता आणि सामाजिक सलोखा जपण्याचे आवाहन करण्यात आले.
या कार्यक्रमाला धारणी नगर पंचायतचे नगराध्यक्ष सुनील चौथमल यांची प्रमुख उपस्थिती होती. धारणी पोलीस स्टेशनचे ठाणेदार अवतारसिंग चव्हाण यांच्या मार्गदर्शनाखाली पोलीस अधिकारी आणि कर्मचाऱ्यांनी या उपक्रमात सहभाग घेतला. तसेच ज्ञान मंदिर शाळेतील विद्यार्थी, शिक्षक आणि मुख्याध्यापकही मोठ्या संख्येने उपस्थित होते.
कार्यक्रमादरम्यान सहभागी विद्यार्थ्यांमध्ये आणि नागरिकांमध्ये विशेष उत्साह पाहायला मिळाला. राष्ट्रीय एकात्मतेचे महत्त्व अधोरेखित करणाऱ्या या उपक्रमातून समाजातील सर्व घटकांनी एकजुटीने राहावे, देशाच्या अखंडतेसाठी कटिबद्ध राहावे आणि सामाजिक सलोखा टिकवून ठेवावा, असा संदेश देण्यात आला.
सरदार वल्लभभाई पटेल यांनी देशाच्या एकीकरणासाठी दिलेल्या योगदानाचे स्मरण करून त्यांच्या विचारांचा वारसा पुढे नेण्याचा संकल्प यावेळी व्यक्त करण्यात आला. पोलीस प्रशासन आणि शैक्षणिक संस्थांच्या संयुक्त सहभागामुळे हा कार्यक्रम नियोजनबद्ध पद्धतीने पार पडला.
‘एक भारत, श्रेष्ठ भारत’ या संकल्पनेला बळ देणारी धारणीतील ही एकता दौड राष्ट्रीय एकात्मतेप्रती नागरिकांची बांधिलकी अधोरेखित करणारी ठरली.
