नागपूर गुन्हे शाखेची मोठी कारवाई; वाहनचोरी व घरफोडी करणाऱ्या टोळीचा पर्दाफाश, १३ गुन्हे उघडकीस
नागपूर गुन्हे शाखेने वाहनचोरी आणि घरफोडी करणाऱ्या टोळीचा पर्दाफाश करत मोठी कारवाई केली आहे. एका तपासादरम्यान तब्बल १३ गुन्हे उघडकीस आले असून १४ चोरीच्या दुचाकींसह १२ लाख ६१ हजार रुपयांचा मुद्देमाल जप्त करण्यात आला आहे. या कारवाईमुळे शहरातील वाहनचोरांच्या टोळीला मोठा धक्का बसला असून पोलिसांच्या तपासाला महत्त्वाचे यश मिळाले आहे.
मिळालेल्या माहितीनुसार, गुन्हे शाखा युनिट क्रमांक ५ ला गुप्त माहिती प्राप्त झाली होती. त्यानुसार सम्राट अशोक चौक परिसरात विशेष सापळा रचण्यात आला. भारत कंपनी पेट्रोल पंपाजवळ संशयास्पद हालचाली करत बसलेल्या दोन तरुणांना पोलिसांनी ताब्यात घेतले. चौकशीदरम्यान आकाश उर्फ भुऱ्या परिहार आणि एका विधीसंघर्ष बालकाने अनेक गुन्ह्यांची कबुली दिली.
आरोपींनी दोन महिन्यांपूर्वी यशोधरानगर परिसरातून पांढऱ्या रंगाची ॲक्टिव्हा दुचाकी चोरी केल्याचे कबूल केले. तसेच ५ जून रोजी हुडकेश्वर पोलीस ठाण्याच्या हद्दीतील प्रनानगर परिसरातील एका बंद घरात घरफोडी करून सोने-चांदीचे दागिने आणि लॅपटॉप चोरी केल्याची माहितीही तपासात समोर आली.
पोलिसांनी आरोपींकडून चोरीची ॲक्टिव्हा, मोबाईल फोन, लॅपटॉप, सोन्या-चांदीचे दागिने तसेच इतर मौल्यवान वस्तू जप्त केल्या. पुढील तपासादरम्यान आणखी धक्कादायक खुलासे झाले. विविध पोलीस ठाण्यांच्या हद्दीतून चोरीला गेलेल्या तब्बल १४ दुचाकी वाहनांचा शोध लावण्यात पोलिसांना यश आले.
या कारवाईत यशोधरानगर, लकडगंज, इमामवाडा, सक्करदरा, धंतोली, अंबाझरी आणि कन्हाण पोलीस ठाण्यांच्या हद्दीतील एकूण १३ गुन्ह्यांची उकल झाली आहे. जप्त करण्यात आलेल्या १४ दुचाकी वाहनांची किंमत सुमारे १० लाख ३० हजार रुपये असल्याचे सांगितले जात आहे. तर चोरीच्या इतर साहित्यांसह एकूण १२ लाख ६१ हजार रुपयांचा मुद्देमाल हस्तगत करण्यात आला आहे.
दरम्यान, या प्रकरणातील भुपन उर्फ ऑटो ठाकरे हा आरोपी अद्याप फरार असून त्याचा शोध घेण्यासाठी पोलिसांची पथके कार्यरत आहेत. फरार आरोपीला अटक झाल्यानंतर आणखी काही गुन्ह्यांचा उलगडा होण्याची शक्यता पोलिसांनी व्यक्त केली आहे.
गुन्हे शाखेच्या या यशस्वी कारवाईमुळे नागपूर शहरातील वाहनचोरी आणि घरफोडीच्या अनेक गुन्ह्यांचा छडा लागला असून नागरिकांमध्ये समाधान व्यक्त केले जात आहे. आता फरार आरोपीच्या अटकेकडे आणि पुढील तपासातून समोर येणाऱ्या नव्या खुलाशांकडे सर्वांचे लक्ष लागले आहे.
