म्यानमारचे राष्ट्राध्यक्ष यू मिन आंग ह्लाईंग यांची गेट वे ऑफ इंडियाला भेट; ऐतिहासिक वारशाची घेतली माहिती
मुंबई | प्रतिनिधी
भारत दौऱ्यावर आलेले म्यानमारचे राष्ट्राध्यक्ष यू मिन आंग ह्लाईंग यांनी बुधवारी मुंबईतील ऐतिहासिक गेट वे ऑफ इंडिया स्मारकाला भेट देत त्याच्या वास्तुकलेची आणि ऐतिहासिक वारशाची माहिती जाणून घेतली.
यावेळी राष्ट्राध्यक्षांसोबत म्यानमारचे शिष्टमंडळ, ताज हॉटेलचे प्रतिनिधी तसेच संबंधित अधिकारी उपस्थित होते. गेट वे ऑफ इंडियाच्या परिसरात पोहोचल्यानंतर ह्लाईंग यांनी स्मारकाची बारकाईने पाहणी केली आणि त्याच्या स्थापत्यशास्त्रीय वैशिष्ट्यांविषयी सविस्तर माहिती घेतली.
भेटीदरम्यान त्यांनी गेट वे ऑफ इंडियाचा इतिहास, बांधकामातील कलात्मकता, वास्तुरचना आणि भारताच्या इतिहासातील या स्मारकाचे महत्त्व याबाबत विशेष उत्सुकता दाखवली. या ऐतिहासिक वास्तूच्या जतन आणि भव्यतेचेही त्यांनी कौतुक केले.
गेट वे ऑफ इंडिया हे मुंबईचे प्रमुख पर्यटनस्थळ आणि देशाच्या सांस्कृतिक वारशाचे प्रतीक मानले जाते. या स्मारकाच्या ऐतिहासिक आणि वास्तुशिल्पीय पैलूंबाबत माहिती घेताना राष्ट्राध्यक्षांनी विविध बाबी जाणून घेण्याची उत्सुकता व्यक्त केली.
म्यानमारच्या राष्ट्राध्यक्षांच्या या भेटीमुळे मुंबईतील ऐतिहासिक वारसा आणि भारत-म्यानमार संबंधांच्या दृष्टीने या दौऱ्याला विशेष महत्त्व प्राप्त झाले आहे.
