वाशिम जिल्ह्यात पोलिसांची मोठी कारवाई; ५ दिवसांत ७८ दारू अड्ड्यांवर छापे, १८ लाखांचा मुद्देमाल जप्त
वाशिम | प्रतिनिधी
वाशिम जिल्ह्यात अवैध गावठी हातभट्टी दारू विक्रीविरोधात पोलिसांनी मोठी धडक मोहीम राबवत गेल्या पाच दिवसांत तब्बल ७८ ठिकाणी छापेमारी केली आहे. या कारवाईत देशी, विदेशी आणि गावठी दारूसह सुमारे १८ लाख रुपयांचा मुद्देमाल जप्त करण्यात आला असून अनेक आरोपींविरोधात गुन्हे दाखल करण्यात आले आहेत.
जिल्ह्यात अवैधरित्या सुरू असलेल्या दारू विक्री आणि हातभट्टी व्यवसायावर आळा घालण्यासाठी पोलिस प्रशासनाने विशेष मोहीम हाती घेतली होती. या मोहिमेदरम्यान विविध पोलीस ठाण्यांच्या पथकांनी संयुक्त कारवाई करत अनेक ठिकाणी छापे टाकले.
कारवाईत मोठ्या प्रमाणात देशी व विदेशी मद्य तसेच गावठी हातभट्टी दारू जप्त करण्यात आली. संबंधित आरोपींविरोधात महाराष्ट्र दारूबंदी कायद्यानुसार गुन्हे नोंदविण्यात आले असून पुढील तपास सुरू आहे.
दरम्यान, जिल्ह्यात कुठेही अवैध दारू विक्री, वाहतूक किंवा निर्मिती सुरू असल्याची माहिती नागरिकांनी तातडीने पोलीस नियंत्रण कक्षाला द्यावी, असे आवाहन पोलिसांनी केले आहे. माहिती देणाऱ्या व्यक्तीची ओळख पूर्णपणे गोपनीय ठेवण्यात येईल, असेही पोलिस प्रशासनाने स्पष्ट केले आहे.
या विशेष मोहिमेमुळे अवैध दारू व्यवसाय करणाऱ्यांमध्ये खळबळ उडाली असून जिल्ह्यात अशा कारवाया पुढेही सुरू राहणार असल्याचे संकेत पोलिसांकडून देण्यात आले आहेत.
