“भारतीय राजकारणातील जोकर” ; संजय राऊतांच्या ट्रम्प पोस्टवरून भाजपचा जोरदार हल्लाबोल

पश्चिम बंगाल विधानसभा निवडणुकीच्या निकालावरून शिवसेना (उद्धव बाळासाहेब ठाकरे) पक्षाचे खासदार संजय राऊत यांनी अमेरिकेचे राष्ट्राध्यक्ष डोनाल्ड ट्रम्प यांना उद्देशून केलेल्या पोस्टनंतर राजकीय वर्तुळात नवा वाद निर्माण झाला आहे. भाजपने राऊतांवर जोरदार टीका करत त्यांना “भारतीय राजकारणातील जोकर” अशी उपाधी दिली आहे.

भाजपचे प्रवक्ते शहजाद पूनावाला यांनी शुक्रवारी संजय राऊतांवर निशाणा साधताना आरोप केला की, “देशांतर्गत राजकीय फायद्यासाठी भारताची प्रतिमा आंतरराष्ट्रीय स्तरावर मलीन करण्याचा प्रयत्न केला जात आहे.” त्यांनी संजय राऊतांना “Indian politicsचा joker” असे संबोधत तीव्र टीका केली.

वादाची सुरुवात संजय राऊत यांच्या सोशल मीडिया पोस्टमुळे झाली. अमेरिकेचे राष्ट्राध्यक्ष डोनाल्ड ट्रम्प यांनी पश्चिम बंगालमधील भाजपच्या विजयाबद्दल पंतप्रधान नरेंद्र मोदी यांचे अभिनंदन केल्याच्या वृत्तांवर प्रतिक्रिया देताना राऊत यांनी ही निवडणूक भारताच्या संघीय लोकशाहीतील अंतर्गत बाब असल्याचं म्हटलं.

तसेच, कोणत्याही परदेशी नेत्याकडून अशा प्रकारचं अभिनंदन किंवा राजकीय भाष्य “अवेळी आणि अयोग्य” असल्याचंही त्यांनी आपल्या पोस्टमध्ये नमूद केलं.

राऊतांच्या या वक्तव्यानंतर भाजपने आक्रमक भूमिका घेत विरोधकांवर देशाची प्रतिमा खराब करण्याचा आरोप केला आहे. भाजपच्या मते, भारतातील लोकशाही प्रक्रिया सक्षम असून अशा प्रकारची विधानं आंतरराष्ट्रीय स्तरावर चुकीचा संदेश देऊ शकतात.

दरम्यान, या मुद्द्यावरून सोशल मीडियावरही मोठ्या प्रमाणात प्रतिक्रिया उमटताना दिसत आहेत. काहींनी संजय राऊत यांच्या भूमिकेला समर्थन दिलं आहे, तर काहींनी भाजपच्या टीकेचं समर्थन करत राऊतांवर निशाणा साधला आहे.

पश्चिम बंगाल निवडणुकीच्या निकालानंतर सुरू झालेला हा राजकीय वाद आता राष्ट्रीय स्तरावर चर्चेचा विषय बनला असून, पुढील काही दिवसांत यावर आणखी राजकीय प्रतिक्रिया उमटण्याची शक्यता आहे.