नांदगाव खंडेश्वर ‘मुख्यमंत्री माझी लाडकी बहीण’ योजनेचे हप्ते प्रलंबित असल्यामुळे आणि तांत्रिक अडचणींमुळे नांदगाव खंडेश्वर तालुक्यातील महिलांमध्ये प्रचंड संताप पाहायला मिळत आहे. शिवसेना (ठाकरे गट) नेते प्रकाश मारोटकर यांच्या नेतृत्वात शेकडो महिलांनी मंगळवारी तहसील कार्यालय आणि बालविकास प्रकल्प अधिकारी कार्यालयावर धडक दिली. यावेळी संतप्त महिलांनी प्रशासनाला घेराव घालून सरकारविरोधात जोरदार घोषणाबाजी केली.
४ हजार महिला लाभापासून वंचित
तालुक्यातील तब्बल ४ हजार महिलांनी ई-केवायसी (e-KYC) प्रक्रिया पूर्ण करूनही त्यांना नोव्हेंबर आणि डिसेंबर महिन्याचे हप्ते मिळालेले नाहीत. यासोबतच, ई-केवायसी प्रक्रियेत विचारल्या जाणाऱ्या किचकट प्रश्नांमुळे तांत्रिक चुका झाल्या असून, अनेक महिलांचे अर्ज प्रलंबित पडले आहेत. शासनाने पोर्टल बंद केल्यामुळे नवीन अर्ज भरता येत नाहीत, असा आरोप आंदोलकांनी केला आहे.
प्रशासनाला १५ दिवसांचा अल्टिमेटम
आंदोलकांनी तहसीलदार आणि बालविकास प्रकल्प अधिकाऱ्यांना मागण्यांचे निवेदन सादर केले. त्यांच्या प्रमुख मागण्या खालीलप्रमाणे आहेत:
- प्रलंबित हप्ते: नोव्हेंबर-डिसेंबरचे प्रलंबित हप्ते तात्काळ जमा करण्यात यावे.
- पोर्टल पुन्हा सुरू करा: नवीन नोंदणीसाठी लाडकी बहीण योजनेचे पोर्टल त्वरित सुरू करावे.
- दुरुस्तीचा पर्याय: ऑनलाईन पोर्टलवर त्रुटी दुरुस्तीचे (Correction) पर्याय उपलब्ध करून द्यावेत.
- यादी जाहीर करा: पात्र-अपात्र महिलांची यादी कारणासहित प्रसिद्ध करावी.
रास्ता रोकोचा इशारा
शिवसेना नेते प्रकाश मारोटकर यांनी प्रशासनाला निर्वाणीचा इशारा दिला आहे. “जर पुढील १५ दिवसांत महिलांचे हप्ते जमा झाले नाहीत आणि पोर्टल सुरू झाले नाही, तर लाडक्या बहिणींना सोबत घेऊन तीव्र ‘रास्ता रोको’ आंदोलन करण्यात येईल,” असे त्यांनी यावेळी स्पष्ट केले.
यांची होती उपस्थिती
या आंदोलनात नगराध्यक्ष सौ. प्राप्ती मारोटकर, महिला बालकल्याण सभापती कांता लोमटे, नगरसेवक प्रिती इखार, माजी उपसभापती रेखा नागोलकर, अनिता भंडारे, शिवसेनेचे पंकज पिंपळकर, निलेश इखार, पवन पुसदकर, राष्ट्रवादीचे मो. साजिद यांच्यासह शेकडो महिला आणि कार्यकर्ते उपस्थित होते.
