यवतमाळ विधान परिषद निवडणूक : भाजप नेते नितीन भुतडा यांचा उमेदवारी अर्ज दाखल; राजकीय चर्चांना उधाण
यवतमाळ, प्रतिनिधी : यवतमाळ विधान परिषद निवडणुकीच्या पार्श्वभूमीवर भाजपमध्ये बंडखोरीचे संकेत दिसू लागले आहेत. भाजपचे नेते नितीन भुतडा यांनी आज आपला उमेदवारी अर्ज दाखल केला. विशेष म्हणजे पक्षाच्या वरिष्ठ नेत्यांच्या सूचनेनुसारच आपण अर्ज दाखल केल्याचा दावा नितीन भुतडा यांनी केला आहे.
यवतमाळ विधान परिषद निवडणुकीत उमेदवारीवरून राजकीय घडामोडींना वेग आला आहे. भाजपचे नेते नितीन भुतडा यांनी अधिकृतपणे उमेदवारी अर्ज दाखल केल्याने स्थानिक राजकारणात चर्चांना उधाण आले आहे.
माध्यमांशी संवाद साधताना नितीन भुतडा यांनी सांगितले की, पक्षाच्या वरिष्ठ नेतृत्वाच्या सूचनेनुसार आपण उमेदवारी अर्ज दाखल केला आहे. तसेच महायुतीमध्ये ही जागा शिवसेनेला देण्याचा अंतिम निर्णय झाल्यास आपण युती धर्माचे पालन करू आणि पक्षाच्या निर्णयाचा सन्मान राखू, असेही त्यांनी स्पष्ट केले.
भुतडा यांच्या उमेदवारीमुळे यवतमाळच्या राजकीय वर्तुळात विविध तर्कवितर्कांना उधाण आले असून महायुतीकडून या जागेबाबत अंतिम निर्णय काय होतो, याकडे सर्वांचे लक्ष लागले आहे.
दरम्यान, नितीन भुतडा यांची उमेदवारी कायम राहणार की पक्षाच्या निर्णयानुसार मागे घेतली जाणार, याबाबतची उत्सुकता वाढली असून आगामी काही दिवसांत या निवडणुकीचे चित्र अधिक स्पष्ट होण्याची शक्यता आहे.
