धावडा येथे इंधनटंचाई गंभीर; पेट्रोल पंपांवरील रांगांमुळे महामार्गावर अपघाताचा धोका
जालना जिल्ह्यातील भोकरदन तालुक्यातील धावडा येथे इंधनटंचाईने गंभीर स्वरूप धारण केले आहे. मशागतीचा हंगाम सुरू असताना डिझेल आणि पेट्रोलसाठी शेतकरी अक्षरशः रात्रभर रांगेत उभे राहत आहेत. धावडा येथील अनवेकर पेट्रोल पंपावर ट्रॅक्टर आणि वाहनांच्या इतक्या मोठ्या रांगा लागल्या आहेत की अजंठा-बुलढाणा राष्ट्रीय महामार्गावरील वाहतुकीवरही त्याचा परिणाम होत आहे.
भोकरदन तालुक्यात सध्या खरीपपूर्व मशागतीची कामे वेगाने सुरू आहेत. शेतीच्या कामांसाठी ट्रॅक्टर, पंपसेट आणि इतर यंत्रांना मोठ्या प्रमाणात डिझेलची आवश्यकता असते. मात्र इंधनाच्या अपुऱ्या उपलब्धतेमुळे शेतकऱ्यांना मोठ्या अडचणींचा सामना करावा लागत आहे.
धावडा येथील अनवेकर पेट्रोल पंपावर डिझेल आणि पेट्रोल भरण्यासाठी रात्रीपासूनच ट्रॅक्टर, दुचाकी आणि इतर वाहनांच्या लांबच लांब रांगा लागत आहेत. अनेक शेतकरी संपूर्ण रात्र वाहनांसह प्रतीक्षा करत असून सकाळपर्यंतही गर्दी कायम राहत असल्याचे चित्र पाहायला मिळत आहे.
इंधन वेळेवर उपलब्ध होत नसल्यामुळे शेतीची अत्यंत महत्त्वाची मशागतीची कामे खोळंबण्याची भीती शेतकऱ्यांकडून व्यक्त केली जात आहे. वेळेत मशागत न झाल्यास आगामी पेरणीवर परिणाम होऊ शकतो, अशी चिंता शेतकरी व्यक्त करत आहेत.
दरम्यान, अजंठा-बुलढाणा राष्ट्रीय महामार्गालगत असलेल्या या पेट्रोल पंपावर वाहनांच्या रांगा इतक्या वाढल्या आहेत की महामार्गावरील एक्झिट पट्टाच अडथळ्यांनी भरल्यासारखी परिस्थिती निर्माण झाली आहे. ट्रॅक्टर आणि अन्य वाहनांच्या अनियंत्रित रांगांमुळे वाहतुकीचा वेग मंदावला असून अपघाताचा धोका वाढला आहे.
महामार्गावरून वेगाने धावणाऱ्या वाहनांसाठी ही परिस्थिती धोकादायक ठरत आहे. स्थानिक नागरिक आणि वाहनचालकांमध्येही भीतीचे वातावरण निर्माण झाले असून कोणतीही मोठी दुर्घटना घडण्यापूर्वी प्रशासनाने तातडीने उपाययोजना कराव्यात, अशी मागणी होत आहे.
वाहनांच्या रांगा शिस्तबद्ध पद्धतीने लावणे, वाहतूक नियंत्रणासाठी पोलीस बंदोबस्त तैनात करणे आणि इंधन पुरवठा सुरळीत करण्यासाठी संबंधित यंत्रणांनी तातडीने हस्तक्षेप करावा, अशी मागणी शेतकरी आणि नागरिकांकडून केली जात आहे.
धावडा येथील इंधनटंचाईचा फटका थेट शेतकऱ्यांच्या शेतीकामांवर आणि नागरिकांच्या दैनंदिन जीवनावर बसत आहे. दुसरीकडे महामार्गालगत वाढलेल्या वाहनांच्या रांगांमुळे सुरक्षेचाही गंभीर प्रश्न निर्माण झाला आहे. आता प्रशासन या परिस्थितीवर कितपत वेगाने आणि प्रभावीपणे नियंत्रण मिळवते, याकडे सर्वांचे लक्ष लागले आहे.
