नागपूरमध्ये लाखोंच्या घरफोडीचा छडा; गणेशपेठ पोलिसांनी उत्तर प्रदेशातून दोन आरोपींना केली अटक
नागपूर शहरातून एक मोठी आणि धक्कादायक बातमी समोर आली आहे. गणेशपेठ पोलिसांनी लाखोंच्या घरफोडीचा छडा लावत थेट उत्तर प्रदेशातून दोन आरोपींना अटक केली आहे. सीसीटीव्ही फुटेज आणि तांत्रिक तपासाच्या आधारे पोलिसांनी ही मोठी कारवाई करत लाखोंचा मुद्देमाल जप्त केला आहे.
१३ मे २०२६ रोजी नागपूर शहरातील संत्रा मार्केट रोडवरील रतन प्लाझा येथील एका फ्लॅटमध्ये घरफोडीची घटना घडली होती. फिर्यादी भारती संदीप तिवारी यांनी घराला कुलूप लावून बाहेर गेल्यानंतर अज्ञात चोरट्यांनी कुलूप तोडून घरात प्रवेश केला.
चोरट्यांनी घरातील बेडरूममधील अलमारीचे लॉक तोडून रोख रक्कम तसेच सोन्या-चांदीचे दागिने असा एकूण जवळपास ९ लाख ७५ हजार रुपयांचा ऐवज लंपास केला. घटना उघडकीस येताच परिसरात खळबळ उडाली होती.
घटनेची माहिती मिळताच गणेशपेठ पोलिसांनी तात्काळ तपासाची सूत्रे हाती घेतली. पोलिसांनी घटनास्थळ परिसरातील सीसीटीव्ही फुटेज तसेच रेल्वे प्रशासनाच्या कॅमेऱ्यांचे बारकाईने विश्लेषण केले. तांत्रिक तपास आणि गुप्त माहितीच्या आधारे आरोपींचा माग काढण्यात आला.
तपासादरम्यान आरोपी उत्तर प्रदेशातील हापूड येथे असल्याची माहिती मिळाल्यानंतर पोलिसांचे विशेष पथक थेट उत्तर प्रदेशात रवाना झाले. तेथे आदिल शकील कुरेशी आणि गुल मोहम्मद इरफान अली या दोन आरोपींना अटक करण्यात आली.
या कारवाईत पोलिसांनी रोख रक्कम आणि कारसह एकूण ४ लाख ७५ हजार रुपयांचा मुद्देमाल जप्त केला आहे. उर्वरित मुद्देमालाचा शोध सुरू असून आरोपींकडून आणखी चौकशी केली जात आहे.
या संपूर्ण तपासाचे नेतृत्व पोलीस उपनिरीक्षक विजेंद्र नाचण यांनी केले. त्यांच्या पथकाने तांत्रिक तपास, सीसीटीव्ही विश्लेषण आणि वेगवान कारवाईच्या जोरावर हा गुन्हा उघडकीस आणत उल्लेखनीय कामगिरी बजावली आहे.
नागपूर पोलिसांच्या या धडक कारवाईमुळे पुन्हा एकदा गुन्हेगारांना कडक संदेश मिळाला आहे. राज्याबाहेर पळून गेलेल्या आरोपींनाही शोधून काढण्याची क्षमता पोलिसांनी दाखवून दिली असून या कारवाईची शहरभर चर्चा सुरू आहे.
