नागपूर : उपराजधानी नागपुरात गुन्हेगारी घटनांमध्ये सातत्याने वाढ होत असतानाच गुरुवारी सकाळी आधार नगरीजवळील मैदानात एका युवकाचा रक्तबंबाळ अवस्थेतील मृतदेह आढळून आल्याने परिसरात एकच खळबळ उडाली. अज्ञात आरोपींनी दगडाने ठेचून युवकाची निर्घृण हत्या केल्याचा प्राथमिक अंदाज पोलिसांनी व्यक्त केला आहे.
मृत युवकाची ओळख आकाश कृष्णा बरडे (वय २८, रा. पंचशील नगर) अशी झाली आहे. घटनास्थळी मोठ्या प्रमाणात रक्त सांडलेले होते, तर मृतदेहाची अवस्था अत्यंत विद्रूप होती. त्यामुळे ही हत्या अत्यंत क्रूर पद्धतीने करण्यात आल्याचे स्पष्ट झाले.
घटनेची माहिती मिळताच पोलिसांनी तात्काळ घटनास्थळी धाव घेत पंचनामा सुरू केला. सुरुवातीला मृताची ओळख पटत नव्हती. त्यानंतर ठाणेदार गोकुल महाजन यांनी मृताचे छायाचित्र सोशल मीडियावर आणि स्थानिक कंत्राटदारांच्या गटांमध्ये प्रसारित केले.
पोलिसांची ही युक्ती यशस्वी ठरली आणि दुपारच्या सुमारास आकाश बरडे यांची पत्नी पल्लवी पोलीस ठाण्यात पोहोचली. तिने मृतदेहाची ओळख पटवली. बुधवारी संध्याकाळपासून आकाश बेपत्ता असल्याची माहितीही तिने पोलिसांना दिली.
या हत्येमागचे नेमके कारण अद्याप स्पष्ट झाले नसले तरी जुन्या वादातून किंवा वैयक्तिक कारणांमधून हा खून झाला असावा, असा प्राथमिक संशय व्यक्त केला जात आहे. पोलिसांनी आरोपींच्या शोधासाठी विशेष पथके रवाना केली असून परिसरातील सीसीटीव्ही फुटेज आणि तांत्रिक पुराव्यांच्या आधारे तपास सुरू केला आहे.
नागपुरात सातत्याने घडणाऱ्या गंभीर गुन्ह्यांमुळे नागरिकांमध्ये भीतीचे वातावरण निर्माण झाले आहे. या घटनेनंतर गुन्हेगारांचा तातडीने शोध घेऊन कठोर कारवाई करण्याची मागणी जोर धरत आहे.
या प्रकरणाचा तपास नागपूर शहर पोलीस यांच्या मार्गदर्शनाखाली सुरू आहे.
