नरसापुर प्रकरणाच्या निषेधार्थ अमरावतीत संतापाचा उद्रेक; दोषींना फाशीच्या शिक्षेची मागणी
अमरावती | प्रतिनिधी
पुणे जिल्ह्यातील नरसापुर येथे तीन वर्षांच्या निष्पाप बालिकेसोबत घडलेल्या अमानवीय आणि संतापजनक घटनेच्या निषेधार्थ अमरावतीत तीव्र संताप व्यक्त करण्यात आला. या घटनेनंतर राज्यभर संतापाची लाट उसळली असून, अमरावतीतही समाज एकवटत न्यायाच्या मागणीसाठी रस्त्यावर उतरल्याचं चित्र पाहायला मिळालं.
श्री सरयूपारीण ब्राह्मण सभेच्या नेतृत्वाखाली मोठ्या संख्येने समाजबांधव, महिला आणि युवकांनी जिल्हाधिकारी कार्यालयावर मोर्चा काढत प्रशासनासमोर तीव्र निषेध नोंदवला. हातात निषेधाचे फलक, चेहऱ्यावर संताप आणि मनात न्यायाची ठाम मागणी घेऊन आंदोलक जिल्हाधिकारी कार्यालयात दाखल झाले.
या आंदोलनादरम्यान प्रशासनाला देण्यात आलेल्या निवेदनात नरसापुर प्रकरणातील दोषींना फाशीची शिक्षा देण्याची ठाम मागणी करण्यात आली. तसेच या प्रकरणाची सुनावणी फास्ट ट्रॅक न्यायालयात घेण्यात यावी, पीडित कुटुंबाला तातडीने पोलीस संरक्षण द्यावं आणि शासनाकडून आर्थिक मदत जाहीर करावी, अशी मागणीही निवेदनातून करण्यात आली.
सभेच्या पदाधिकाऱ्यांनी यावेळी स्पष्ट शब्दांत सांगितलं की, ही केवळ एका कुटुंबाची वेदना नसून संपूर्ण समाजाच्या मनावर झालेला आघात आहे. अशा घटना केवळ एका कुटुंबाला नाही, तर संपूर्ण समाजमनाला जखमी करणाऱ्या आहेत, अशी भावना आंदोलकांनी व्यक्त केली.
भारतीय संस्कृतीत स्त्रीला नेहमीच सर्वोच्च स्थान देण्यात आलं आहे. रामायण आणि महाभारतासारख्या महान ग्रंथांतही अन्यायाविरोधात लढा देण्याचा संदेश देण्यात आला आहे. अशा वेळी समाजाने मौन बाळगणं म्हणजे अन्यायाला मूक संमती देण्यासारखं आहे, अशा शब्दांत आंदोलनकर्त्यांनी आपली भूमिका स्पष्ट केली.
डॉ. सतीश तिवारी यांच्या नेतृत्वाखालील प्रतिनिधीमंडळाने उपजिल्हाधिकारी मार्फत शासनाला निवेदन सादर केलं. या आंदोलनात महिला मंडळ, युवा वर्ग आणि समाजबांधवांचा उत्स्फूर्त सहभाग पाहायला मिळाला.
आंदोलनकर्त्यांनी स्पष्ट इशारा दिला की, पीडितेला न्याय मिळेपर्यंत हा लढा थांबणार नाही. अमरावतीतून उठलेला हा आवाज आता राज्यभर उमटण्याची चिन्हं असून, न्यायासाठी समाज एकवटल्यास अन्यायाला थारा राहत नाही, हा ठाम संदेश या आंदोलनातून देण्यात आला.
