न्हावा शेवा बंदरात DRI ची ‘Pyro Heist’ कारवाई; 70 टन चिनी फटाके जप्त, दोघे अटकेत
मुंबईजवळील न्हावा शेवा बंदरात महसूल गुप्तचर संचालनालयाने (DRI) मोठी कारवाई करत तब्बल 70 मेट्रिक टन चिनी फटाके जप्त केले आहेत. “पायरो हाइस्ट” या गुप्त मोहिमेअंतर्गत करण्यात आलेल्या या कारवाईत सुमारे 17 कोटी 7 लाख रुपयांचा मुद्देमाल जप्त करण्यात आला असून, दोन आरोपींना अटक करण्यात आली आहे. या कारवाईमुळे तस्करीच्या मोठ्या रॅकेटचा पर्दाफाश झाला आहे.
मिळालेल्या माहितीनुसार, DRI च्या मुंबई विभागाने 20 एप्रिल रोजी न्हावा शेवा बंदर परिसरात ही कारवाई केली. चीनमधून भारतात बेकायदेशीररीत्या आणण्यात आलेले फटाके चार कंटेनरमध्ये लपवून ठेवण्यात आले होते. सीमाशुल्क तपासणीपासून बचाव करण्यासाठी या कंटेनरमधील मालाची नोंद इतर वस्तू म्हणून करण्यात आली होती.
तपासादरम्यान आरोपींनी कंटेनर फ्रेट स्टेशनमध्ये (CFS) कंटेनरची सील तोडून फटाक्यांचा माल दुसऱ्या वाहनात हलवण्याचा प्रयत्न केला. मात्र, DRI अधिकाऱ्यांनी सापळा रचून ही कारवाई उधळून लावली आणि माल हस्तांतरण सुरू असतानाच आरोपींना रंगेहात पकडले.
या कारवाईत तब्बल 70 मेट्रिक टन चिनी बनावटीचे फटाके जप्त करण्यात आले. जप्त केलेल्या फटाक्यांची अंदाजे किंमत 17.07 कोटी रुपये असल्याचे सांगण्यात आले आहे. भारतात चिनी फटाक्यांवर बंदी असतानाही मोठ्या प्रमाणात तस्करी करून हे फटाके बाजारात विक्रीसाठी आणले जात असल्याचा संशय व्यक्त केला जात आहे.
या प्रकरणी दोन जणांना अटक करण्यात आली असून, तस्करीच्या या संपूर्ण साखळीचा तपास सुरू आहे. या रॅकेटमध्ये आणखी कोणाचा सहभाग आहे, याचा शोध DRI कडून घेतला जात आहे.
न्हावा शेवा बंदरातील या मोठ्या कारवाईमुळे बेकायदेशीर आयात आणि तस्करीविरोधात DRI ने मोठा दणका दिला असून, पुढील काळात अशा कारवायांची तीव्रता वाढण्याची शक्यता आहे.
