भाईंदरमध्ये ऑर्केस्ट्रा बारवर मध्यरात्री पोलिसांचा छापा; 13 महिलांची सुटका, अल्पवयीन मुलगीही आढळली
ठाणे जिल्ह्यातील भाईंदर पूर्व परिसरात मध्यरात्री पोलिसांनी एका ऑर्केस्ट्रा बारवर धाड टाकत मोठी कारवाई केली आहे. या कारवाईदरम्यान 13 महिलांची सुटका करण्यात आली असून, त्यामध्ये एका अल्पवयीन मुलीचाही समावेश असल्याने खळबळ उडाली आहे. बार व्यवस्थापन महिलांकडून अश्लील नृत्य करून ग्राहकांना आकर्षित करत असल्याची धक्कादायक बाब पोलिस तपासात समोर आली आहे.
मिळालेल्या माहितीनुसार, भाईंदर पूर्व येथील एका ऑर्केस्ट्रा बारमध्ये परवानगीपेक्षा जास्त महिलांना कामावर ठेवून त्यांच्याकडून अश्लील नृत्य सादर करून घेतले जात असल्याची गुप्त माहिती पोलिसांना मिळाली होती. या माहितीच्या आधारे गुरुवारी रात्री उशिरा, मध्यरात्रीच्या सुमारास पोलिसांनी बारवर छापा टाकला.
या कारवाईत रंगमंचावर महिला नृत्य करत असल्याचे आढळून आले. पोलिसांनी तात्काळ कारवाई करत 13 महिलांची सुटका केली. विशेष म्हणजे, या महिलांमध्ये एका अल्पवयीन मुलीचाही समावेश असल्याने प्रकरण अधिक गंभीर बनले आहे.
ठाणे गुन्हे शाखेचे उपायुक्त संदीप दोईफोडे यांनी दिलेल्या माहितीनुसार, बार व्यवस्थापन महिलांना ग्राहकांसमोर अश्लील नृत्य करण्यास भाग पाडत होते. तसेच ग्राहकांना आकर्षित करण्यासाठी नियमबाह्य पद्धतीने महिलांची नेमणूक करण्यात आल्याचेही तपासात उघड झाले आहे.
पोलिसांनी बार व्यवस्थापनाविरोधात विविध कलमांखाली गुन्हा दाखल करण्याची प्रक्रिया सुरू केली असून, अल्पवयीन मुलीला ताब्यात घेऊन तिची समुपदेशन आणि संरक्षणाची प्रक्रिया सुरू करण्यात आली आहे. सुटका करण्यात आलेल्या सर्व महिलांची वैद्यकीय तपासणी करण्यात येत असून, या प्रकरणाचा पुढील तपास सुरू आहे.
या कारवाईमुळे भाईंदर परिसरात खळबळ उडाली असून, अशा बारवर पोलिसांची कारवाई आणखी तीव्र होण्याची शक्यता व्यक्त केली जात आहे.
