“माहूरमध्ये जनावर चोरट्यांचा सुळसुळाट; आठवडाभरात १५-१६ जनावरे लंपास, सीसीटीव्हीत कैद”
नांदेड जिल्ह्यातील माहूर शहरातून एक धक्कादायक प्रकार समोर आला आहे. गेल्या आठवडाभरात जनावरांच्या चोरीच्या घटनांमध्ये मोठी वाढ झाली असून अज्ञात चोरट्यांनी तब्बल १५ ते १६ गायींसह इतर जनावरे लंपास केल्याच्या घटना उघडकीस आल्या आहेत. या प्रकारामुळे पशुपालकांमध्ये भीती आणि संतापाचे वातावरण निर्माण झाले आहे.
विशेष म्हणजे, काही ठिकाणी चोरीची संपूर्ण घटना सीसीटीव्ही कॅमेऱ्यात कैद झाली आहे. या फुटेजच्या आधारे पोलिसांना आरोपींपर्यंत पोहोचण्यासाठी महत्त्वाचा धागा मिळण्याची शक्यता व्यक्त केली जात आहे.
दरम्यान, सामाजिक कार्यकर्ते व गोरक्षक प्रमुख सोनू चौधरी पाटील यांनी माहूर पोलीस ठाण्यात निवेदन देत तातडीने कारवाईची मागणी केली आहे. वारंवार तक्रारी करूनही ठोस कारवाई होत नसल्याचा आरोप त्यांनी केला. या चोरीमुळे पशुपालकांचे मोठ्या प्रमाणात आर्थिक नुकसान होत असून नागरिकांनीही स्वाक्षरी मोहीम राबवत दोषींवर कठोर कारवाईची मागणी केली आहे.
पोलिस प्रशासनाने या वाढत्या घटनांची गंभीर दखल घेऊन तातडीने चोरट्यांचा बंदोबस्त करावा, अशी मागणी जोर धरत आहे.
माहूरमध्ये वाढत्या जनावर चोरीच्या घटनांमुळे नागरिकांमध्ये संतापाची लाट उसळली असून, सीसीटीव्हीच्या आधारे आरोपींचा लवकरच माग काढला जाईल का, याकडे सर्वांचे लक्ष लागले आहे.
