केरळमधील फटाके कारखाना स्फोटप्रकरणी विशेष तपास पथक; त्रिशूर दुर्घटनेत १३ जणांचा मृत्यू
केरळमधील त्रिशूर जिल्ह्यातील मुंडथिकोडे येथे फटाके बनविणाऱ्या कारखान्यात झालेल्या भीषण स्फोटात १३ जणांचा मृत्यू झाला असून अनेक जण गंभीर जखमी झाले आहेत. या दुर्घटनेनंतर केरळ पोलिसांनी या प्रकरणाच्या चौकशीसाठी विशेष तपास पथक अर्थात SIT स्थापन करण्याची घोषणा केली आहे.
केरळचे राज्य पोलीस प्रमुख रवाडा चंद्रशेखर यांनी बुधवारी ही माहिती दिली. त्यांनी सांगितले की, या स्फोटामागचे नेमके कारण शोधण्यासाठी विशेष पथक नियुक्त करण्यात आले असून, तपास सर्व बाजूंनी केला जाणार आहे.
दरम्यान, राज्य पोलीस प्रमुख स्वतः त्रिशूर येथे जाऊन दुर्घटनास्थळाची पाहणी करणार आहेत. त्यानंतर पोलीस, महसूल विभाग, अग्निशमन आणि बचाव सेवा विभाग तसेच पेट्रोलियम आणि स्फोटक सुरक्षा संघटनेच्या अधिकाऱ्यांसोबत उच्चस्तरीय बैठक घेतली जाणार आहे.
प्राथमिक तपासात काही धक्कादायक बाबी समोर आल्या आहेत. पोलिसांनी या स्फोटामध्ये बंदी घालण्यात आलेल्या आणि अत्यंत धोकादायक रसायनांचा वापर झाल्याची शक्यता व्यक्त केली आहे. विशेषतः पोटॅशियम क्लोरेटसारख्या सहज पेट घेणाऱ्या आणि घर्षणामुळे पटकन प्रतिक्रिया देणाऱ्या रसायनांचा वापर झाला असावा, असा संशय आहे.
तपास अधिकाऱ्यांच्या मते, कारखान्यातील उष्णतेमुळे या रसायनांमध्ये अचानक रासायनिक प्रक्रिया झाली असावी आणि त्यामुळे मोठा स्फोट घडला असण्याची शक्यता आहे. सध्या तरी या घटनेत घातपात किंवा जाणीवपूर्वक केलेल्या कारवाईचे कोणतेही ठोस पुरावे आढळले नसल्याचे पोलिसांनी स्पष्ट केले आहे.
या भीषण दुर्घटनेनंतर परिसरात शोककळा पसरली असून, जखमींवर विविध रुग्णालयांत उपचार सुरू आहेत. मृतांचा आकडा वाढण्याचीही भीती व्यक्त केली जात आहे.
या प्रकरणाचा तपास आता विशेष पथकाकडे सोपवण्यात आला असून, फटाके कारखान्यांमध्ये सुरक्षा नियमांचे पालन होत होते का, परवानगीपेक्षा जास्त स्फोटक साठवण्यात आले होते का, आणि धोकादायक रसायनांचा वापर करण्यात आला होता का, याची सखोल चौकशी केली जाणार आहे.
