परतवाडा व्हायरल व्हिडिओ प्रकरणात मोठी हालचाल; मुख्य आरोपी अयान अहमदची अचलपूरमध्ये सखोल चौकशी
परतवाडा येथे सोशल मीडियावर व्हायरल झालेल्या आक्षेपार्ह व्हिडिओ प्रकरणाला आता नवे वळण मिळाले आहे. या प्रकरणातील मुख्य आरोपी अयान अहमद याला पोलिसांनी ताब्यात घेतल्यानंतर अचलपूर येथे आणून सखोल चौकशी सुरू केली आहे. या कारवाईदरम्यान काही धक्कादायक दृश्ये समोर आल्याने परिसरात चर्चांना उधाण आले आहे.
मिळालेल्या माहितीनुसार, अयान अहमदला अचलपूरमधील सरमसपुरा पोलीस ठाण्यात चौकशीसाठी आणण्यात आले. पोलिसांकडून त्याच्यासह इतर संशयित आरोपींचीही कसून चौकशी सुरू असल्याचे समजते. या प्रकरणातील व्हिडिओ, मोबाईल फोन, सोशल मीडिया अकाउंट्स आणि डिजिटल पुराव्यांच्या आधारे तपास पुढे नेला जात आहे.
दरम्यान, पोलिसांनी अयान अहमदला चौकशीसाठी नेत असताना तो व्यवस्थित चालत नसल्याचे दृश्य समोर आले. त्यामुळे स्थानिकांमध्ये विविध चर्चांना उधाण आले आहे. मात्र, याबाबत पोलिसांकडून कोणतीही अधिकृत माहिती देण्यात आलेली नाही.
तपासाचा भाग म्हणून पोलिसांनी अयान अहमदला त्याच्या अचलपूर येथील राहत्या घरीही नेले. तेथे गुन्ह्यात वापरण्यात आलेल्या मोबाईल आणि इतर साहित्याबाबत तपास करण्यात आला. पोलिसांनी घराची पाहणी करत काही महत्त्वाची माहिती आणि पुरावे गोळा केल्याची माहिती समोर आली आहे.
या संपूर्ण कारवाईदरम्यान अचलपूरमध्ये मोठ्या संख्येने नागरिक जमा झाले होते. आरोपीला पोलिसांनी सार्वजनिक ठिकाणी आणल्यानंतर परिसरात मोठी गर्दी झाली आणि तणावपूर्ण वातावरण निर्माण झाले.
दरम्यान, या प्रकरणाचा तपास अधिक वेगाने सुरू असून, पुढील काही दिवसांत आणखी महत्त्वाचे खुलासे होण्याची शक्यता व्यक्त केली जात आहे. मुख्य आरोपीसह इतर संशयितांवरही पोलिसांची कारवाई सुरू असून, या प्रकरणातील पुढील घडामोडींवर संपूर्ण परिसराचे लक्ष लागले आहे.
