१५ मिनिटांत १५ कोटींची दरोडेखोरी! सिंगरौलीत बँक ऑफ महाराष्ट्रवर पाच सशस्त्र दरोडेखोरांचा थरारक हल्ला
मध्य प्रदेशातील सिंगरौली जिल्ह्यात शुक्रवारी दुपारी घडलेल्या धाडसी बँक दरोड्याने संपूर्ण शहर हादरून गेले आहे. बैढन परिसरातील बँक ऑफ महाराष्ट्र शाखेत पाच नकाबपोश दरोडेखोरांनी भरदिवसा धाड टाकत अवघ्या १५ ते २० मिनिटांत तब्बल १५ कोटींचा ऐवज लुटला. या घटनेदरम्यान दरोडेखोरांनी बँक व्यवस्थापकाला मारहाण केली, हवेत गोळीबार केला आणि बँकेत उपस्थित ग्राहक व कर्मचाऱ्यांना बंदुकीच्या धाकावर ओलीस ठेवले.
शुक्रवारी दुपारी सुमारे १२.५० वाजण्याच्या सुमारास बँकेत नेहमीप्रमाणे व्यवहार सुरू होते. त्याच वेळी दोन नकाबपोश दरोडेखोर बँकेत दाखल झाले. काही क्षणांतच त्यांच्या आणखी तीन साथीदारांनी हातात शस्त्रे घेऊन बँकेत प्रवेश केला. अचानक झालेल्या या प्रकारामुळे ग्राहक आणि कर्मचारी घाबरून गेले. दरोडेखोरांनी सर्वांना बंदुकीच्या धाकावर एका ठिकाणी बसवले आणि संपूर्ण बँक आपल्या ताब्यात घेतली.
दरम्यान, बँक व्यवस्थापकांनी विरोध करण्याचा प्रयत्न केला असता दरोडेखोरांनी त्यांच्यावर निर्दयीपणे हल्ला केला. बंदुकीच्या बटाने त्यांच्या डोक्यावर वार करण्यात आला. या हल्ल्यात व्यवस्थापक गंभीर जखमी झाले असून त्यांच्या डोक्यातून मोठ्या प्रमाणात रक्तस्त्राव झाला.
भीतीचे वातावरण निर्माण करण्यासाठी दरोडेखोरांनी बँकेच्या आत आणि बाहेर हवेत गोळीबारही केला. अचानक झालेल्या गोळीबारामुळे परिसरात मोठी घबराट पसरली. गोळीबाराचा आवाज ऐकून आजूबाजूचे नागरिक घाबरून बाहेर धावले.
दरोडेखोरांनी बँकेतून सुमारे २० लाख रुपये रोख रक्कम आणि जवळपास १० किलो सोन्याचे दागिने लुटल्याची माहिती समोर आली आहे. या सोन्या-रोख रकमेसह लुटीचा एकूण आकडा तब्बल १५ कोटी रुपयांपर्यंत पोहोचल्याचे सांगितले जात आहे. पोलिसांच्या माहितीनुसार, रोख रकमेतील सुमारे १४.५० लाख रुपये आधीपासून बँकेत होते, तर उर्वरित रक्कम दिवसाच्या नव्या व्यवहारातून जमा झाली होती.
संपूर्ण दरोडा अवघ्या १५ ते २० मिनिटांत टाकून दरोडेखोर दोन मोटारसायकलींवरून घटनास्थळावरून पसार झाले. घटनेची माहिती मिळताच पोलिसांनी तातडीने परिसर सील करत शोधमोहीम सुरू केली आहे. सीसीटीव्ही फुटेजच्या आधारे दरोडेखोरांची ओळख पटवण्याचे काम सुरू असून, या थरारक घटनेमुळे बँक सुरक्षेवर गंभीर प्रश्नचिन्ह निर्माण झाले आहे.
