‘गौमाता रक्ततुला’ उपक्रमाचा विक्रम; अमरावतीत १८२ युनिट रक्तसंकलन, नागरिकांचा उत्स्फूर्त सहभाग
अमरावती : शहरात सामाजिक बांधिलकीचं प्रेरणादायी उदाहरण समोर आलं असून, “गौमाता सन्मान अभियान” अंतर्गत आयोजित रक्तदान शिबिराला नागरिकांचा अभूतपूर्व प्रतिसाद मिळाला आहे. या उपक्रमाने एक नवा विक्रमही प्रस्थापित केला आहे.
रविवारी अमरावतीतील माहेश्वरी भवन येथे भगवान परशुराम जयंतीनिमित्त “गौमाता रक्ततुला” या अनोख्या संकल्पनेतून भव्य रक्तदान शिबिराचे आयोजन करण्यात आले होते. सकाळी पूजा-अर्चनेने कार्यक्रमाची सुरुवात झाली आणि सायंकाळपर्यंत चाललेल्या या शिबिरात तब्बल १८२ युनिट रक्त संकलित करण्यात आले.
विशेष म्हणजे, आतापर्यंत आयोजित शिबिरांमधून एकूण १०४६ युनिट रक्त संकलन पूर्ण झाले असून, लक्ष्य पूर्ण करण्यासाठी अजून ४५४ युनिट रक्ताची आवश्यकता असल्याची माहिती आयोजकांनी दिली.
या उपक्रमात युवक, महिला, ज्येष्ठ नागरिक तसेच प्रथमच रक्तदान करणाऱ्या तरुणांचा उत्साह विशेष लक्षवेधी ठरला. शिबिरात नोंदणीपासून वैद्यकीय तपासणी आणि रक्तसंकलनापर्यंत सर्व प्रक्रिया अत्यंत शिस्तबद्ध आणि सुरक्षित पद्धतीने पार पडली.
या सामाजिक उपक्रमासाठी अखिल भारतीय ब्राह्मण महासंघ, माहेश्वरी पंचायत, गौरक्षण संस्था आणि रामचरित मानस परिषद यांचा संयुक्त सहभाग लाभला.
दरम्यान, या अभियानाचा पुढील टप्पा १६ एप्रिल रोजी राजापेठ येथील दीपार्चन येथे पार पडणार असून, अधिकाधिक नागरिकांनी रक्तदान करून सहभागी व्हावे, असे आवाहन आयोजकांकडून करण्यात आले आहे.
“रक्तदान हेच जीवनदान” या संदेशातून समाजात सेवा, संवेदना आणि सकारात्मक बदल घडवण्याचा प्रयत्न या उपक्रमातून होत असल्याचे चित्र दिसत आहे.
