अमरावतीत तणावाची ठिणगी? पंचवटी चौकात हॉकर्समध्ये वाद, परिस्थिती चिघळण्याची भीती
अमरावती शहरातील पंचवटी चौकात सध्या तणावपूर्ण परिस्थिती निर्माण झाली असून, नारळ विक्री करणाऱ्या हातगाड्यांवरून दोन समुदायांतील हॉकर्स आमने-सामने आल्याची माहिती समोर येत आहे.
मिळालेल्या माहितीनुसार, जागेच्या वादातून सुरुवात झालेला हा संघर्ष हळूहळू वाढत गेला. दोन्ही बाजूंमध्ये शाब्दिक चकमकी झाल्यानंतर काही ठिकाणी किरकोळ भांडणाच्या घटनाही घडल्याचं सांगितलं जात आहे. त्यामुळे परिसरात तणावाचं वातावरण निर्माण झालं असून, परिस्थिती अधिक बिघडू नये यासाठी तातडीने हस्तक्षेपाची गरज व्यक्त केली जात आहे.
या पार्श्वभूमीवर शहीद भगतसिंग हॉकर्स युनियन पुढे सरसावली आहे. युनियनने महानगरपालिका आयुक्तांना निवेदन देत, वादग्रस्त हातगाड्यांवर तात्काळ कारवाई करण्याची मागणी केली आहे. दोन्ही गटांना समजावण्याचा प्रयत्न करूनही परिस्थिती नियंत्रणात येत नसल्याचं युनियनचं म्हणणं आहे.
विशेष म्हणजे, 13 नोव्हेंबर 2021 रोजी अमरावतीत घडलेल्या तणावपूर्ण घटनांची पुनरावृत्ती टाळण्यासाठी ही पावलं उचलली जात असल्याचंही युनियनने स्पष्ट केलं आहे.
युनियनने इशारा देत म्हटलं आहे की, या वादातून जर कोणतीही जीवितहानी किंवा धार्मिक तणाव निर्माण झाला, तर त्यासाठी महानगरपालिका प्रशासन आणि अतिक्रमण विभाग जबाबदार राहील.
यावेळी संस्थापक अध्यक्ष गणेश मारोटकर, जिल्हाध्यक्ष दीप राज लोखंडे यांच्यासह अनेक पदाधिकारी उपस्थित होते.
👉 सध्या परिस्थिती संवेदनशील असून, प्रशासनाची तातडीची भूमिका आणि नागरिकांचा संयम अत्यंत महत्त्वाचा ठरणार आहे.
