गोरेगाव पूर्वात शोभायात्रेदरम्यान हिंसक संघर्ष; ८ जण अटकेत, परिसरात तणाव
मुंबईतील गोरेगाव पूर्व परिसरात काल मरियम माता शोभायात्रेदरम्यान दोन गटांमध्ये झालेल्या वादाने अचानक हिंसक रूप धारण केल्याची धक्कादायक घटना समोर आली आहे. संतोष नगर भागातील या घटनेत अनेक जण जखमी झाले असून काही काळासाठी परिसरात तणावपूर्ण वातावरण निर्माण झाले होते.
मिळालेल्या माहितीनुसार, संतोष नगर मार्केट परिसरातील ज्योती बार अँड रेस्टॉरंटजवळ शोभायात्रा सुरू असताना किरकोळ कारणावरून दोन गट आमनेसामने आले. सुरुवातीला झालेला वाद काही क्षणातच तीव्र होत ढकलाढकली आणि मारहाणीपर्यंत पोहोचला. या गोंधळामुळे उपस्थितांमध्ये भीतीचे वातावरण निर्माण झाले.
या घटनेत जखमी झालेल्या काहींवर जोगेश्वरी येथील ट्रॉमा केअर रुग्णालयात उपचार सुरू आहेत. परिस्थितीची माहिती मिळताच दिंडोशी पोलीस ठाण्याचे पथक तात्काळ घटनास्थळी दाखल झाले. सुरुवातीला पोलिसांनी जमावाला शांत करण्याचा प्रयत्न केला, मात्र परिस्थिती नियंत्रणाबाहेर जात असल्याने हलका लाठीचार्ज करण्यात आला.
या प्रकरणी पोलिसांनी गुन्हा दाखल करत ८ जणांना अटक केली असून घटनास्थळावरील सीसीटीव्ही फुटेजची तपासणी सुरू आहे. इतर आरोपींचा शोध सुरू असून परिसरात कडेकोट पोलीस बंदोबस्त ठेवण्यात आला आहे.
दरम्यान, या घटनेनंतर स्थानिक नागरिकांमध्ये असुरक्षिततेची भावना निर्माण झाली असून भविष्यात अशा घटनांना आळा घालण्यासाठी कठोर उपाययोजना करण्याची मागणी जोर धरत आहे.
