भोंदू बाबा अशोक खरातची पोलीस कोठडी १ एप्रिलपर्यंत वाढवली; नाशिक न्यायालयाचा निर्णय
नाशिक (प्रतिनिधी):
बलात्कार प्रकरणात अटक करण्यात आलेल्या भोंदू बाबा अशोक खरात याच्या पोलीस कोठडीत १ एप्रिलपर्यंत वाढ करण्यात आली आहे. नाशिक येथील न्यायालयाने रविवारी (२९ मार्च २०२६) हा आदेश दिला.
मिळालेल्या माहितीनुसार, अशोक खरात याच्याविरोधात आतापर्यंत एकूण १० गुन्हे दाखल करण्यात आले आहेत. त्यापैकी ८ गुन्हे लैंगिक अत्याचार आणि शोषणासंदर्भातील असून, २ गुन्हे फसवणुकीचे आहेत. हे सर्व गुन्हे नाशिक शहरातील सरकारवाडा पोलीस ठाण्यात नोंदवण्यात आले आहेत.
मिरगाव (जि. नाशिक) येथील मंदिर ट्रस्टचा प्रमुख असलेला खरात याला १८ मार्च रोजी अटक करण्यात आली होती. एका महिलेने गेल्या तीन वर्षांपासून वारंवार बलात्कार केल्याचा आरोप केल्यानंतर ही कारवाई करण्यात आली.
दरम्यान, या प्रकरणामुळे राज्यात खळबळ उडाली असून, अनेक नामांकित राजकीय व्यक्तींनी पूर्वी खरात याला भेट दिल्याचेही समोर आले आहे. पोलिसांकडून या प्रकरणाचा सखोल तपास सुरू आहे.
या प्रकरणात आणखी धक्कादायक माहिती समोर येण्याची शक्यता व्यक्त केली जात आहे.
