अमरावती : बुद्ध पौर्णिमेच्या लख्ख प्रकाशात संपूर्ण रात्र जंगलातील थरार अनुभवण्याची संधी यंदाही निसर्ग अनुभवाच्या माध्यमातून उपलब्ध होणार आहे. येत्या २३ मे रोजी बुद्ध पौर्णिमा असून त्यानिमित्ताने होणाऱ्या वन्यप्राणी प्रगणनेसाठी मेळघाट व्याघ्र प्रकल्प क्षेत्रात तयारी पूर्ण झाली आहे.मेळघाट व्याघ्र प्रकल्पांतर्गत येत्या २३ मे रोजी निसर्गानुभव कार्यक्रम राबवण्यात येणार आहे. या कार्यक्रमांतर्गत मचाण बुकिंगची सुविधा गुरूवार १६ मे पासून ‘मॅजिकमेळघाट डॉट इन’ (magicmelghat.in) या संकेतस्थळावर उपलब्ध करून देण्यात आली आहे. या निसर्गानुभव कार्यक्रमासाठी मेळघाट व्याघ्र प्रकल्पांतर्गत १३१ मचाण उपलब्ध राहणार आहेत. या मचाणांवरून बुद्ध पौर्णिमेच्या लखलखत्या प्रकाशात निसर्ग सौंदर्यासोबतच विविध प्राणी पाहण्याची संधी उपलब्ध होणार आहे.
