‘साहेब, आमचा ऑक्सिजन हिरावून घेऊ नका!’

भीमाशंकरच्या जंगलातील वृक्षतोडीविरोधात भोकरदनच्या चिमुकल्यांचा पुढाकार; भावनिक निवेदनातून जंगल वाचविण्याची आर्त हाक

भोकरदन प्रतिनिधी : झाडे वाचवा, जंगल वाचवा आणि आमचे भविष्य सुरक्षित करा, अशी आर्त साद घालत भोकरदन येथील चिमुकल्या मुलांनी भीमाशंकर परिसरातील कथित वृक्षतोडीविरोधात आवाज उठविला आहे. साहेब, आमचा ऑक्सिजन हिरावून घेऊ नका… भीमाशंकरचे जंगल वाचवा! अशा भावनिक शब्दांत या मुलांनी प्रशासनाकडे निवेदन सादर करत पर्यावरण रक्षणाची मागणी केली.

लहान वयातच पर्यावरण संवर्धनाची जाणीव ठेवून चिमुकल्यांनी उचललेले हे पाऊल परिसरात चर्चेचा विषय ठरत आहे. कर्जत-भीमाशंकर परिसरातील वृक्षतोडीच्या पार्श्वभूमीवर मुलांनी जंगल आणि पर्यावरणाच्या संरक्षणासाठी आपला आवाज बुलंद केला.

झाडे नसतील तर आम्ही श्वास कसा घेणार?

झाडे ही केवळ निसर्गाची शोभा नसून मानवी जीवनासाठी अत्यंत आवश्यक असलेल्या प्राणवायूचा महत्त्वपूर्ण स्रोत आहेत. जंगलांचा ऱ्हास झाल्यास वन्यजीव आणि पक्ष्यांचा अधिवास धोक्यात येईल, पर्यावरणाचे संतुलन बिघडेल आणि त्याचे गंभीर परिणाम भविष्यातील पिढ्यांना भोगावे लागतील, अशी चिंता चिमुकल्यांनी आपल्या निवेदनातून व्यक्त केली.

आम्हाला झाडे, पक्षी आणि निसर्ग खूप आवडतो. झाडांमुळे आम्हाला ऑक्सिजन मिळतो. झाडेच नसतील तर आम्ही श्वास कसा घेणार? पक्षी आपली घरटी कुठे बांधणार? आम्हाला हिरवीगार जंगले आणि स्वच्छ हवा हवी आहे. त्यामुळे वृक्षतोड थांबवून भीमाशंकरचे जंगल वाचवा आणि आमचे भविष्य सुरक्षित करा, अशी भावनिक मागणी मुलांनी केली.

चिमुकल्यांच्या प्रश्नाने मोठ्यांना आत्मपरीक्षणाची गरज

विकासाच्या प्रक्रियेत पर्यावरण संवर्धनालाही तितकेच महत्त्व देणे आवश्यक असल्याची भावना या घटनेतून व्यक्त होत आहे. जंगलांचा ऱ्हास आणि मोठ्या प्रमाणावरील वृक्षतोडीमुळे निसर्गाचे संतुलन धोक्यात येण्याची भीती पर्यावरणप्रेमी व्यक्त करत आहेत.

आपल्या भविष्यासाठी लहान मुलांनी स्वतः पुढाकार घेऊन प्रशासनाचे लक्ष वेधणे ही बाब समाजातील प्रत्येक घटकाला विचार करायला लावणारी आहे. विकास आणि पर्यावरण यामध्ये योग्य समतोल राखण्याची गरज या चिमुकल्यांच्या निवेदनातून अधोरेखित झाली आहे.

पर्यावरण रक्षण ही सर्वांचीच जबाबदारी

पर्यावरणाचे संरक्षण ही केवळ शासन किंवा प्रशासनाची जबाबदारी नसून प्रत्येक नागरिकाचे कर्तव्य आहे. झाडे टिकली तरच शुद्ध हवा, जैवविविधता आणि निसर्गाचा समतोल टिकून राहणार आहे.

चिमुकल्यांनी प्रशासनाला दिलेल्या निवेदनाची संबंधित यंत्रणांनी गांभीर्याने दखल घेऊन वृक्षतोडीच्या प्रश्नावर योग्य ती कार्यवाही करावी, अशी अपेक्षा पर्यावरणप्रेमींकडून व्यक्त केली जात आहे.

निवेदन देणारे चिमुकले

पर्यावरण रक्षणासाठी पुढाकार घेत ईशानी ईश्वर इंगळे, जान्हवी समाधान बोर्डे, माहिरा विकास जाधव, जिजाऊ रंजित जाधव, क्रितिका विकास जाधव, शिवराज ईश्वर इंगळे, शुभ्रा विकास जाधव, देवांश समाधान बोर्डे आणि श्रीतेज विकास जाधव या चिमुकल्यांनी वृक्षतोडीविरोधात निवेदन देत आपली भूमिका मांडली.

जंगल वाचले तर निसर्ग वाचेल आणि निसर्ग वाचला तरच उद्याची पिढी सुरक्षित राहील. चिमुकल्यांनी उपस्थित केलेला आमचा ऑक्सिजन हिरावून घेऊ नका हा भावनिक प्रश्न आता प्रशासनापर्यंत पोहोचला असून, त्यांच्या या आर्त हाकेला संबंधित यंत्रणा काय प्रतिसाद देते, याकडे सर्वांचे लक्ष लागले आहे.