नवनीत राणा यांच्या निवासस्थानी पारंपरिक बैलपोळा साजरा!
बैलांचे विधिवत पूजन करून नैवेद्य दाखवला; शेतकरी बांधवांना शुभेच्छा देत ग्रामीण संस्कृती जपण्याचा संदेश
अमरावती : महाराष्ट्राच्या ग्रामीण संस्कृतीशी नाळ जोडणारा आणि बळीराजाच्या जीवनातील महत्त्वाचा सण असलेला बैलपोळा अमरावतीत भाजप नेत्या आणि माजी खासदार नवनीत राणा तसेच आमदार रवी राणा यांच्या निवासस्थानी पारंपरिक पद्धतीने साजरा करण्यात आला.
यंदाचा बैलपोळा राणा दाम्पत्याच्या निवासस्थानी कोणताही मोठा गाजावाजा न करता साध्या आणि पारंपरिक वातावरणात साजरा करण्यात आला. नवनीत राणा यांनी बैलांचे विधिवत पूजन करून त्यांना नैवेद्य दाखवला. वर्षभर शेतीच्या कामात शेतकऱ्याला साथ देणाऱ्या बैलांप्रती त्यांनी यावेळी कृतज्ञता व्यक्त केली.
बैलांच्या गळ्यातील घुंगरांचा आवाज, पारंपरिक सजावट आणि पूजेच्या विधींमुळे राणा यांच्या निवासस्थानी ग्रामीण संस्कृतीची अनुभूती पाहायला मिळाली. बैलांना सजवून त्यांची पूजा करण्यात आली आणि या कष्टकरी साथीदारांविषयी आदर व्यक्त करण्यात आला.
यावेळी नवनीत राणा यांनी महाराष्ट्रातील शेतकरी बांधवांना बैलपोळ्याच्या शुभेच्छा दिल्या. आपल्या मातीतल्या परंपरा आणि ग्रामीण संस्कृतीचे जतन करणे ही प्रत्येकाची जबाबदारी असल्याचा संदेश त्यांनी दिला.
बैलपोळा हा केवळ सण नसून शेतकरी आणि बैल यांच्यातील जिव्हाळ्याचे नाते, प्रेम आणि कृतज्ञता व्यक्त करण्याचा दिवस आहे. याच भावनेतून राणा दाम्पत्याच्या निवासस्थानी साधेपणा, श्रद्धा आणि पारंपरिक वातावरणात बैलपोळा उत्साहात पार पडला.
