नागपुरात एमडी सदृश्य पावडरसह दोघे ताब्यात!
नंदनवनच्या देशपांडे लेआउटमध्ये अमली पदार्थ विरोधी पथकाची कारवाई; १ लाख ६२ हजारांचा मुद्देमाल जप्त, एका संशयिताचा शोध सुरू
नागपूर : शहरातील अमली पदार्थांची तस्करी आणि विक्री रोखण्यासाठी नागपूर पोलिसांकडून कारवाई तीव्र करण्यात आली आहे. नंदनवन पोलीस ठाण्याच्या हद्दीतील देशपांडे लेआउट परिसरात अमली पदार्थ विरोधी पथकाने कारवाई करत एमडी सदृश्य पावडरसह दोघांना ताब्यात घेतले आहे. तर या प्रकरणातील एका संशयित आरोपीचा शोध सुरू आहे.
एनआयटी गार्डनसमोर अमली पदार्थ विरोधी पथकाने ही कारवाई केली. कारवाईदरम्यान सुनील हरबंसलाल जुनेजा आणि अतुल दिलीप शेंडे या दोघांना ताब्यात घेण्यात आले.
पोलिसांनी केलेल्या कारवाईत त्यांच्याकडून १७.४०० ग्रॅम एमडी सदृश्य पावडर जप्त करण्यात आली. या पदार्थाची अंदाजे किंमत ५२ हजार २०० रुपये असल्याची माहिती देण्यात आली आहे. यासोबत दोन मोबाईल फोन आणि एक दुचाकी मोपेडही जप्त करण्यात आली आहे.
या कारवाईत जप्त करण्यात आलेल्या सर्व मुद्देमालाची एकूण किंमत सुमारे १ लाख ६२ हजार २०० रुपये असल्याचे सांगण्यात आले आहे.
दरम्यान, या प्रकरणात निहाल उर्फ बाबा शेंडे हा संशयित आरोपी पाहिजे असून त्याचा शोध घेण्यासाठी पोलिसांकडून तपास सुरू आहे. जप्त करण्यात आलेली पावडर एमडी आहे की अन्य कोणता पदार्थ, याबाबत पुढील तपास आणि आवश्यक चाचण्यांनंतर अधिक स्पष्टता होणार आहे.
ताब्यात घेतलेल्या संशयितांविरुद्ध एनडीपीएस कायद्यानुसार गुन्हा दाखल करण्याची प्रक्रिया नंदनवन पोलीस ठाण्यात सुरू आहे. या प्रकरणामागील अमली पदार्थांचा स्रोत, त्यांचा पुरवठा आणि विक्रीचे जाळे याबाबतही पोलिसांकडून पुढील तपास केला जात आहे.
नागपुरात अमली पदार्थांची तस्करी आणि विक्री रोखण्यासाठी पोलिसांकडून विविध भागांत कारवाई सुरू असून, नंदनवन परिसरातील या कारवाईमुळे अमली पदार्थांच्या अवैध व्यवहारांवर पोलिसांची करडी नजर असल्याचे पुन्हा स्पष्ट झाले आहे.
