मुस्लिम धार्मिक कार्यक्रमांतील DJच्या वापराला धार्मिक स्तरावरून विरोध

मोठ्या आवाजामुळे इतरांना त्रास आणि आरोग्याला धोका; डीजेविरोधात फतवा जारी, प्यारे खान यांच्याकडून स्वागत

नागपूर : मुस्लिम समाजाच्या धार्मिक कार्यक्रमांमध्ये वाढत असलेल्या DJच्या वापरावर आता धार्मिक स्तरावरूनच आक्षेप घेण्यात आला आहे. मोठ्या आवाजामुळे इतरांना त्रास होण्यासोबतच त्यांच्या आरोग्यावर परिणाम होऊ शकतो, त्यामुळे इतरांना त्रास देणारी कृती इस्लाममध्ये मान्य नसल्याचे सांगत DJच्या वापराविरोधात फतवा जारी करण्यात आला आहे.

मुज्तबा शरीफ़ ख़ान अशहरी मिस्बाही, मुहतमिम अल जामेअतुर रज़विया दारुल उलूम अमजदिया यांच्या वतीने हा फतवा जारी करण्यात आला आहे. ईद असो किंवा मुस्लिम समाजाचा कोणताही धार्मिक कार्यक्रम, दर्ग्यावरील कार्यक्रम अथवा संदल असो, अशा धार्मिक कार्यक्रमांमध्ये DJ वाजवू नये, असे या पत्रातून स्पष्ट करण्यात आले आहे.

फतव्यात मोठ्या आवाजातील DJमुळे परिसरातील नागरिकांना त्रास होऊ शकतो आणि त्यांच्या आरोग्यालाही धोका निर्माण होण्याची शक्यता व्यक्त करण्यात आली आहे. त्यामुळे धार्मिक कार्यक्रमांच्या नावाखाली इतरांना त्रास होईल किंवा त्यांच्या आरोग्यावर विपरीत परिणाम होईल, अशी कृती टाळणे आवश्यक असल्याची भूमिका मांडण्यात आली आहे.

धार्मिक कार्यक्रम हे श्रद्धा आणि भक्तीचे माध्यम आहेत. त्यामुळे या कार्यक्रमांमध्ये ध्वनिप्रदूषण होणार नाही आणि इतर नागरिकांना त्रास होणार नाही, याची काळजी घेण्याचे आवाहन या फतव्याच्या माध्यमातून करण्यात आले आहे.

दरम्यान, राज्य अल्पसंख्याक आयोगाचे अध्यक्ष प्यारे खान यांनी या फतव्याचे स्वागत केले आहे. धार्मिक कार्यक्रमांमधील वाढता ध्वनिप्रदूषणाचा प्रश्न लक्षात घेता धार्मिक स्तरावरूनच DJच्या वापराबाबत भूमिका मांडण्यात आल्याने या मुद्द्याला आता वेगळे महत्त्व प्राप्त झाले आहे.

गणेशोत्सव, ईद, संदल तसेच इतर विविध धार्मिक कार्यक्रमांमध्ये मोठ्या आवाजातील DJच्या वापरावरून यापूर्वीही चर्चा आणि वाद निर्माण झाले आहेत. अशा पार्श्वभूमीवर धार्मिक कार्यक्रम साजरे करताना इतरांना त्रास होऊ नये आणि ध्वनिप्रदूषण टाळावे, असा संदेश या फतव्यातून देण्यात आला आहे.

आता या फतव्याला मुस्लिम समाजातून कसा प्रतिसाद मिळतो आणि धार्मिक कार्यक्रमांमध्ये DJच्या वापराबाबत प्रत्यक्षात कितपत अंमलबजावणी होते, याकडे लक्ष लागले आहे.