अमरावती महानगरपालिकेत प्रशासन सुधारण्यासाठी विशेष प्रशिक्षण; आयुक्त वर्षा लड्डा यांच्या पुढाकाराने अधिकाऱ्यांना मार्गदर्शन
अमरावती, प्रतिनिधी : अमरावती महानगरपालिकेच्या प्रशासनाला अधिक कार्यक्षम, पारदर्शक आणि नागरिकाभिमुख बनविण्याच्या दिशेने एक महत्त्वपूर्ण पाऊल उचलण्यात आले आहे. महानगरपालिका आयुक्त वर्षा लड्डा यांच्या पुढाकाराने कार्यालयीन कार्यपद्धती विषयक विशेष प्रशिक्षण कार्यक्रमाचे आयोजन करण्यात आले.
महानगरपालिकेच्या विश्वरत्न डॉ. बाबासाहेब आंबेडकर सभागृहात हा प्रशिक्षण कार्यक्रम पार पडला. प्रशासनातील कामकाज अधिक सुसूत्र, गतिमान आणि पारदर्शक करण्याच्या उद्देशाने आयोजित करण्यात आलेल्या या उपक्रमात विविध विभागांचे अधिकारी, कर्मचारी तसेच प्रशासकीय कामकाजाशी संबंधित कर्मचारी मोठ्या संख्येने सहभागी झाले.
या प्रशिक्षणादरम्यान शासकीय नियमावली, प्रशासकीय प्रक्रिया, फाईल हाताळणी, पत्रव्यवहार, नोंद व्यवस्थापन, सेवा वितरण आणि वेळेचे व्यवस्थापन या महत्त्वाच्या विषयांवर सविस्तर मार्गदर्शन करण्यात आले. तसेच फाईल प्रस्ताव तयार करण्याची पद्धत, निर्णय प्रक्रिया, शासन निर्णयांचे पालन, अभिलेख व्यवस्थापन आणि ई-ऑफिस प्रणालीचा प्रभावी वापर याबाबतही सखोल माहिती देण्यात आली.
यावेळी आयुक्त वर्षा लड्डा यांनी नागरिकांना दर्जेदार आणि वेळेत सेवा उपलब्ध करून देणे ही प्रशासनाची प्राथमिक जबाबदारी असल्याचे स्पष्ट केले. कामकाजात शिस्त, जबाबदारी, पारदर्शकता आणि सकारात्मक दृष्टिकोन ठेवून प्रत्येक अधिकारी व कर्मचाऱ्याने आपले कर्तव्य पार पाडावे, असे आवाहन त्यांनी केले.
प्रशिक्षणादरम्यान कर्मचाऱ्यांनी विविध प्रशासकीय विषयांवर प्रश्न उपस्थित केले. वरिष्ठ अधिकाऱ्यांनी त्यांचे निरसन करत प्रशासनातील कार्यपद्धती अधिक प्रभावीपणे राबविण्यासंदर्भात मार्गदर्शन केले. नागरिकांच्या तक्रारींचे तातडीने निवारण करणे आणि सेवा वितरण अधिक वेगवान करणे यावर विशेष भर देण्यात आला.
महानगरपालिकेत कार्यक्षमतेची संस्कृती रुजविणे, कर्मचाऱ्यांचे कौशल्य वृद्धिंगत करणे आणि नागरिकांना अधिक दर्जेदार सेवा उपलब्ध करून देणे हा या प्रशिक्षणाचा मुख्य उद्देश असल्याचे प्रशासनाकडून सांगण्यात आले. अशा प्रकारची प्रशिक्षण सत्रे नियमितपणे आयोजित करण्यात येणार असल्याची माहितीही यावेळी देण्यात आली.
या उपक्रमामुळे महानगरपालिकेच्या कामकाजात सकारात्मक बदल घडून नागरिकांना अधिक जलद आणि पारदर्शक सेवा मिळण्याची अपेक्षा व्यक्त केली जात आहे.
