NEET 2026 पेपरफुटीचा धक्कादायक खुलासा; नाशिक कनेक्शन समोर, आरोपीने ओळख लपवण्यासाठी केस कापले
देशातील लाखो विद्यार्थ्यांच्या भविष्याशी निगडित असलेली NEET-UG 2026 परीक्षा पुन्हा एकदा वादाच्या भोवऱ्यात सापडली आहे. प्रश्नपत्रिका फुटल्याच्या गंभीर आरोपांनंतर राष्ट्रीय परीक्षा संस्था (NTA) ने 3 मे रोजी झालेली परीक्षा रद्द करण्याचा निर्णय घेतला असून आता फेरपरीक्षा घेतली जाणार आहे. या संपूर्ण प्रकरणाचे धागेदोरे महाराष्ट्रातील नाशिकपर्यंत पोहोचल्याने मोठी खळबळ उडाली आहे.
मिळालेल्या माहितीनुसार, राजस्थानमधून प्रश्नपत्रिका लीक झाल्यानंतर ती नाशिकमध्ये आणण्यात आली. तपास यंत्रणांच्या प्राथमिक माहितीनुसार, प्रश्नपत्रिकेची पहिली प्रिंट नाशिकमध्ये काढण्यात आली आणि त्यानंतर ती हरियाणामार्गे राजस्थानमधील काही विद्यार्थ्यांपर्यंत पोहोचवण्यात आली. या प्रकरणाची चौकशी आता केंद्रीय अन्वेषण विभागाकडे (CBI) सोपवण्यात आली आहे.
या प्रकरणात नाशिक पोलिसांनी शुभम खैरनार या तरुणाला ताब्यात घेतले आहे. तो बीएएमएसचे शिक्षण घेत असल्याची माहिती समोर आली आहे. तपासात असा संशय आहे की त्याने कथितरीत्या प्रश्नपत्रिका सुमारे 10 लाख रुपयांना मिळवून पुढे 15 लाख रुपयांना विकली. ओळख लपवण्यासाठी त्याने केस कापले, कपडे बदलले आणि आपला लूक बदलण्याचा प्रयत्न केला. मात्र तांत्रिक तपास आणि गुप्त माहितीच्या आधारे पोलिसांनी त्याला शोधून काढले.
पेपरफुटीमुळे देशभरातील सुमारे 23 लाख विद्यार्थ्यांना पुन्हा परीक्षा द्यावी लागणार आहे. NTA ने स्पष्ट केले आहे की विद्यार्थ्यांना नव्याने अर्ज करण्याची गरज नाही आणि अतिरिक्त शुल्क आकारले जाणार नाही. नवीन परीक्षेची तारीख लवकरच जाहीर केली जाणार आहे.
ही घटना देशातील परीक्षा व्यवस्थेवरील विश्वासाला मोठा धक्का देणारी ठरली आहे. लाखो विद्यार्थ्यांच्या मेहनतीवर पाणी फेरणाऱ्या अशा प्रकारांवर कठोर कारवाई होणे अत्यावश्यक आहे. या प्रकरणात आणखी कोणकोणाची नावे समोर येतात आणि विद्यार्थ्यांना न्याय मिळतो का, याकडे संपूर्ण देशाचे लक्ष लागले आहे.
