लाखनीत वाढीव कराविरोधात संताप; व्यापारी-नागरिकांचा नगरपंचायत कार्यालयावर मोर्चा
महागाईने होरपळलेल्या जनतेवर आता स्थानिक करांचा बोजा वाढल्याचा आरोप होत आहे. लाखनी (जि. भंडारा जिल्हा) येथील नगरपंचायतीने लागू केलेल्या वाढीव कर आकारणीविरोधात शहरात संतापाची लाट उसळली आहे. व्यापारी आणि नागरिक रस्त्यावर उतरले असून प्रशासनाला जाब विचारला जात आहे. नेमकं काय आहे प्रकरण? पाहूया सविस्तर…
लाखनी शहर आज घोषणाबाजीने दणाणून गेले. निमित्त होते नगरपंचायतीने केलेली कर वाढ. स्थानिक व्यापारी असोसिएशन आणि नागरिकांनी मोठ्या संख्येने लाखनी नगरपंचायत कार्यालयासमोर एकत्र येत निषेध नोंदवला.
आंदोलकांचा आरोप आहे की, ही कर वाढ छोट्या व्यापाऱ्यांचे आणि हातावर पोट असलेल्या कुटुंबांचे कंबरडे मोडणारी आहे. नगरसेवक राजेश निंबेकर यांनी आक्रमक पवित्रा घेत म्हटले की, जनतेशी चर्चा न करता दरवाढ लादण्यात आली. निर्णय मागे घेतला नाही, तर उग्र आंदोलन छेडण्याचा इशाराही त्यांनी दिला.
दुसरीकडे, मुख्याधिकारी आकाश घोडे यांनी स्पष्ट केले की कर आकारणी नियमांनुसारच करण्यात आली आहे; मात्र नागरिकांच्या भावना वरिष्ठ पातळीवर मांडल्या जातील.
आता चेंडू प्रशासनाच्या कोर्टात असून लाखनीकर या प्रश्नावर मागे हटण्याच्या मनःस्थितीत नाहीत.
विकासकामांचा दावा आणि वाढीव करांचा बोजा — या कात्रीत लाखनीची जनता अडकली आहे. प्रशासन कर वाढीचा निर्णय पुनर्विचारासाठी मागे घेते का, याकडे सर्वांचे लक्ष लागले आहे.
अशाच ताज्या अपडेट्ससाठी पाहत राहा City News.
