भुसावळ तालुक्यात धक्कादायक प्रकार; शिकवणीला जाणाऱ्या दोन अल्पवयीन मुलींना तरुणाने विहिरीत ढकलले
जळगाव जिल्ह्यातील भुसावळ तालुक्यातून एक अत्यंत धक्कादायक आणि संतापजनक घटना समोर आली आहे. साकरी गावात भरदिवसा शिकवणीला निघालेल्या दोन अल्पवयीन मुलींना गावातीलच एका तरुणाने जबरदस्तीने विहिरीत ढकलल्याची घटना घडली आहे. दोन्ही मुली इयत्ता नववीत शिक्षण घेत असून, या घटनेमुळे संपूर्ण परिसरात भीती आणि संतापाचे वातावरण निर्माण झाले आहे.
मंगळवारी सकाळी या दोन मुली नेहमीप्रमाणे घरातून शिकवणीसाठी निघाल्या होत्या. गावालगतच्या शेतातून जात असताना दबा धरून बसलेल्या संशयित तरुणाने अचानक त्यांच्यावर हल्ला केला. दोघींना जबरदस्तीने पकडून जवळच्या विहिरीपर्यंत नेऊन त्याने त्यांना विहिरीत ढकलले. या घटनेवेळी मुलींनी जोरजोरात आरडाओरडा केला.
मुलींचा आवाज ऐकून शेतात काम करणाऱ्या ग्रामस्थांचे लक्ष वेधले गेले. क्षणाचाही विलंब न करता ग्रामस्थांनी घटनास्थळी धाव घेतली. विहिरीत पाणी असल्याने मुलींचा जीव वाचवण्यासाठी तातडीने बचावकार्य सुरू करण्यात आले. दोरखंड आणि शिडीच्या सहाय्याने दोन्ही मुलींना सुरक्षित बाहेर काढण्यात ग्रामस्थांना यश आले.
दरम्यान, घटनेची माहिती मिळताच भुसावळ पोलिसांनी तात्काळ कारवाई करत गावातीलच संशयित तरुण रोहन चौधरी याला ताब्यात घेतले आहे. या कृत्यामागील नेमके कारण अद्याप स्पष्ट झालेले नाही. एकतर्फी प्रेम, जुना वाद की मानसिक विकृती, यापैकी नेमके काय कारण आहे, याचा सखोल तपास पोलीस करत आहेत.
या घटनेमुळे पालकांमध्ये तीव्र चिंता व्यक्त केली जात असून, अल्पवयीन मुलींच्या सुरक्षेचा प्रश्न पुन्हा एकदा ऐरणीवर आला आहे.
