अयोध्यात 26 लाखांहून अधिक दिव्यांचा दीपोत्सव; रामनगरीचा जागतिक विक्रम
अयोध्या (20 ऑक्टोबर 2025): रामनगरी अयोध्येत भव्य दीपोत्सव साजरा करण्यात आला असून, या उत्सवाने भारताच्या सांस्कृतिक आणि आध्यात्मिक वैभवाचे दर्शन संपूर्ण जगाला घडवले. शरयू नदीच्या 56 घाटांवर एकाच वेळी 26,17,215 दिवे प्रज्वलित करून अयोध्येने पुन्हा एकदा गिनीज वर्ल्ड रेकॉर्डमध्ये आपले स्थान नोंदवले.
या ऐतिहासिक प्रसंगासाठी गिनीज बुक ऑफ वर्ल्ड रेकॉर्ड्सचे पथक अयोध्येत उपस्थित होते. दीपोत्सवासाठी डॉ. राम मनोहर लोहिया अवध विद्यापीठाच्या 32,000 स्वयंसेवकांनी महत्त्वाची भूमिका बजावली. त्यांनी दिव्यांची रोषणाई यशस्वीपणे पार पाडण्यासाठी अथक मेहनत घेतली.
या वर्षी अयोध्येतील दीपोत्सवाने दोन जागतिक विक्रम प्रस्थापित केले. पहिला विक्रम – 26 लाखांहून अधिक दिव्यांची एकाच वेळी केलेली रोषणाई. यासाठी उत्तर प्रदेश पर्यटन विभाग, अयोध्या जिल्हा प्रशासन आणि विद्यापीठ यांना गिनीज बुकने सन्मानित केले. दुसऱ्या विक्रमात एकाच वेळी 2,128 लोकांनी एकत्रितपणे दिवे प्रज्वलित केले.
दीपोत्सवातील या दिव्यांनी केवळ विक्रम प्रस्थापित केला नाही, तर सामाजिक आणि आर्थिकदृष्ट्याही महत्त्वाचा संदेश दिला. स्थानिक कारागीर, उत्पादने आणि संस्कृतीला प्रोत्साहन देणाऱ्या ‘व्होकल फॉर लोकल’ उपक्रमाला या कार्यक्रमाने बळ दिले. लाखो दिव्यांची व्यवस्था, स्थानिक सहभाग आणि संस्कृतीचा उत्सव – हे सगळे अयोध्येच्या दीपोत्सवात पाहायला मिळाले.
