अमरावतीत माळी पौर्णिमेचा भक्तिमय सोहळा; नवीन रथात विराजमान व्यंकटेश बालाजींची भव्य शोभायात्रा
अमरावती : गणेशोत्सवाच्या उत्साहात अमरावतीत दरवर्षीप्रमाणे यंदाही माळी पौर्णिमेचा भक्तिमय सोहळा मोठ्या उत्साहात पार पडला. व्यंकटेश बालाजी भगवान यांना आकर्षक आणि भव्य रथात विराजमान करून शहरातून शोभायात्रा काढण्यात आली. बालाजींच्या जयघोषाने आणि भजन दिंडीच्या भक्तिमय वातावरणाने संपूर्ण परिसर दुमदुमून गेला.
गणेशोत्सवाची सुरुवात झाल्यानंतर गवळी पूजनाच्या दुसऱ्या दिवशी माळी पौर्णिमेचे आयोजन करण्याची परंपरा आहे. ही परंपरा यंदाही भक्तिभावाने जपण्यात आली. यानिमित्ताने व्यंकटेश बालाजी भगवान यांची भव्य शोभायात्रा शहरातून काढण्यात आली.
या सोहळ्याचे यंदाचे विशेष आकर्षण म्हणजे अनंत कोटी बालाजी भगवान यांच्या नवीन भव्य रथाचे लोकार्पण करण्यात आले. नवीन रथात विराजमान झालेल्या बालाजींचे दर्शन घेण्यासाठी भाविकांनी मोठ्या संख्येने उपस्थिती लावली.
शोभायात्रेत श्री वारकरी भजन दिंडी, काटपूर तसेच श्री गुरुदेव महिला भजन दिंडी, काटपूर यांनी सहभाग घेतला. भजन, अभंग आणि भक्तिगीतांच्या स्वरांनी शोभायात्रेतील वातावरण अधिकच भक्तिमय झाले. बालाजींच्या जयघोषात भाविकांनी मोठ्या उत्साहाने सहभाग घेतला.
शोभायात्रेत सहभागी होणाऱ्या भक्तांसाठी प्रवासाची व्यवस्था करण्यात आली होती. तसेच भोजन आणि प्रसादाचीही व्यवस्था करण्यात आली. त्यामुळे भक्तांनी मोठ्या संख्येने या धार्मिक सोहळ्यात सहभाग घेत बालाजींचे दर्शन घेतले.
भक्ती, परंपरा आणि श्रद्धेचा सुंदर संगम घडवणाऱ्या या माळी पौर्णिमेच्या सोहळ्यामुळे अमरावती शहरात दिवसभर भक्तिमय वातावरण निर्माण झाले. नवीन रथातील व्यंकटेश बालाजींचे दर्शन आणि भव्य शोभायात्रा हे यंदाच्या सोहळ्याचे विशेष आकर्षण ठरले.
