प्रहारच्या पदाधिकाऱ्याचा आत्मदहनाचा प्रयत्न; कामगार उपायुक्त कार्यालयासमोरच अंगावर ओतलं पेट्रोल, नाशिकमधील घटना
सातपूर : येथील कामगार उपायुक्तांच्या कार्यालयासमोर प्रहार कामगार संघटनेचे प्रमोद सोनकांबळे यांनी गुरुवारी दुपारी अंगावर पेट्रोल ओतून घेत आत्मदहनाचा प्रयत्न केला. सातपूर पोलिसांनी वेळीच हस्तक्षेप करीत त्यांना ताब्यात घेतल्याने अनर्थ टळला. नाशिकरोड मालधक्का येथे प्रहार कामगार संघटनेच्या कामगारांवर राजकारणामुळे उपासमारीची वेळ आली आहे.
तत्कालीन मंत्री बच्चू कडू यांचे निर्देश असतानाही या संघटनेला काम मिळू दिले जात नसल्याने आत्मदहनाची वेळ आल्याचा आरोप सोनकांबळे यांनी यावेळी केला. कामगार उपायुक्त, सहकामगार उपायुक्त, रिपब्लिकन एम्प्लॉइज फेडरेशनचे रामबाबा पठारे, भारत निकम आदी यासाठी जबाबदार असल्याचा आरोपही त्यांनी केला. दरम्यान, आम्ही कोणाचीही अडवणूक केलेली नाही, असे पठारे यांनी म्हटले आहे. सोनकांबळे यांनी आंदोलनापूर्वी दिलेल्या पत्रकात म्हटले आहे, की प्रहार कामगार संघटनेचे संस्थापक बच्चू कडू कामगारमंत्री असताना प्रहार कामगार संघटना व रिपब्लिकन एम्प्लॉइज फेडरेशनचे रामबाबा पठारे यांची मंत्रालयात बैठक झाली.
कामगार नेते नरेंद्र पाटील व कामगार युनियनचे पदाधिकारी उपस्थित होते. पठारे यांनी प्रहार संघटनेला दोन बॉक्सचे काम आणि साठ नोंदणी फॉर्म देण्याचे मान्य केले होते. मात्र, मंत्र्यांचे आदेशपत्र मिळून पाच वर्षे होऊनही प्रहार संघटनेच्या सदस्यांना कामगार उपायुक्तांनी न्याय दिलेला नाही. उपायुक्तांनी रिपब्लिकन एम्प्लॉइज फेडरेशन संघटनेची बाजू मांडून उडवाउडवीची उत्तरे दिली. त्यामुळे प्रहार संघटनेच्या कामगारांवर उपासमारीची वेळ आली आहे.
वेळोवेळी निवेदने देऊन, आंदोलने करूनही आम्हाला खोटी आश्वासन देण्यात आली. या कामांचे नियोजन कामगार उपायुक्तांनी करून दिले नाही. त्यामुळेच कामगार उपायुक्त कार्यालयासमोर आत्मदहनाचा निर्णय घ्यावा लागला.
