नागपुरात अवैध दारूविक्रीविरोधात मोठी कारवाई!
इमामवाडा परिसरात वाहनचोरी विरोधी पथकाची धाड; ६४ वर्षीय आरोपी ताब्यात, २२ हजारांचा मुद्देमाल जप्त
नागपूर : शहरात अवैध दारूविक्रीविरोधात पोलिसांची कारवाई सुरू असून गुन्हे शाखेच्या वाहनचोरी विरोधी पथकाने इमामवाडा पोलीस ठाण्याच्या हद्दीत मोठी कारवाई केली आहे. चंदन नगर परिसरात करण्यात आलेल्या या कारवाईत अवैधरित्या साठवून ठेवलेला दारूचा साठा आणि रोकड असा एकूण २२ हजार १२० रुपयांचा मुद्देमाल जप्त करण्यात आला आहे. या प्रकरणी ६४ वर्षीय व्यक्तीला ताब्यात घेण्यात आले आहे.
इमामवाडा पोलीस ठाण्याच्या हद्दीत अवैध दारूविक्री होत असल्याची माहिती पोलिसांना मिळाली होती. या माहितीच्या आधारे गुन्हे शाखेच्या वाहनचोरी विरोधी पथकाने चंदन नगर परिसरात कारवाई केली. हकीमी हार्डवेयरजवळ पोलिसांनी छापा टाकला असता मोहम्मद हुसैन मोहम्मद शेख, वय ६४ वर्षे, याच्या ताब्यात मोठ्या प्रमाणात दारूचा साठा आढळून आला.
पोलिसांनी केलेल्या कारवाईत TUBORG STRONG PREMIUM BEERच्या ६५० मिली क्षमतेच्या २४ सीलबंद बाटल्या जप्त करण्यात आल्या. या दारूची किंमत ४ हजार ९२० रुपये असल्याचे सांगण्यात आले.
यासोबतच भिंगरी संत्रा नंबर वन देशी दारूच्या ९० मिलीच्या १०० सीलबंद बाटल्या जप्त करण्यात आल्या. या दारूची किंमत ४ हजार रुपये आहे. तसेच ROYAL STAG DELUXE WHISKYच्या १८० मिलीच्या ४८ सीलबंद बाटल्याही पोलिसांनी जप्त केल्या असून, त्यांची किंमत १२ हजार रुपये आहे.
दारू विक्रीतून मिळालेली १ हजार २०० रुपयांची रोकड देखील पोलिसांनी ताब्यात घेतली. अशाप्रकारे दारूचा साठा आणि रोकड मिळून एकूण २२ हजार १२० रुपयांचा मुद्देमाल जप्त करण्यात आला.
या प्रकरणी इमामवाडा पोलीस ठाण्यात अप. क्र. ४००/२०२६ नुसार महाराष्ट्र दारूबंदी कायद्याच्या कलम ६५ ई अंतर्गत गुन्हा दाखल करण्यात आला आहे.
जप्त करण्यात आलेला मुद्देमाल पंचांसमक्ष ताब्यात घेण्यात आला असून, आरोपी आणि जप्त मुद्देमाल पुढील कायदेशीर कारवाईसाठी इमामवाडा पोलिसांच्या ताब्यात देण्यात आला आहे.
शहरातील अवैध दारूविक्रीला आळा घालण्यासाठी पोलिसांकडून विविध भागांत कारवाई केली जात असून, या कारवाईमुळे अवैध दारूविक्री करणाऱ्यांमध्ये खळबळ उडाली आहे.
