खापरखेड्यात युवकांवर जीवघेणा हल्ला; १२ जणांवर MCOCAची कारवाई
तलवार, दांडे आणि लाथाबुक्क्यांनी मारहाण; ९ आरोपी आणि ३ विधीसंघर्ष बालक ताब्यात, चौघे फरार
नागपूर | खापरखेडा
नागपूरच्या खापरखेडा परिसरात युवकांवर तलवार, दांडे आणि लाथाबुक्क्यांनी जीवघेणा हल्ला केल्याच्या गंभीर प्रकरणात पोलिसांनी मोठी कारवाई केली आहे. या प्रकरणात आतापर्यंत ९ आरोपी आणि ३ विधीसंघर्ष बालकांना ताब्यात घेण्यात आले असून, संबंधित आरोपींची गुन्हेगारी पार्श्वभूमी आणि संघटित गुन्हेगारीतील सहभाग तपासात समोर आल्यानंतर त्यांच्याविरोधात MCOCA अंतर्गत कारवाई करण्यात आली आहे. दरम्यान, मुख्य आरोपींसह चौघे अद्याप फरार असल्याची माहिती पोलिसांनी दिली आहे.
ही घटना २१ ऑगस्ट रोजी खापरखेडा पोलीस ठाण्याच्या हद्दीतील नाग मंदिर चौक परिसरात घडली होती. फिर्यादी प्रज्वल प्रदीप जाने हे आपल्या मित्रांसोबत चहा पीत असताना सूरज कावळे, संघर्ष बागडे, साहिल बागडे, शुभम मोहिते, सुदाम चाफाडाहाके यांच्यासह इतर आरोपी मोटारसायकल आणि वाहनांमधून त्या ठिकाणी आल्याचे तक्रारीत नमूद करण्यात आले आहे.
यावेळी सूरज कावळे याने तलवारीने हिमांशू कडू आणि रोहित मिश्रा यांच्यावर वार केल्याचा आरोप आहे. तर इतर आरोपींनी दांडे आणि लाथाबुक्क्यांनी फिर्यादी प्रज्वल जाने तसेच त्यांच्या मित्रांना मारहाण केल्याचे पोलिसांकडे दाखल तक्रारीत नमूद आहे.
या हल्ल्यात काही युवकांना गंभीर दुखापत झाली. त्यानंतर या प्रकरणी युवकांना जीवे ठार मारण्याचा प्रयत्न केल्याच्या आरोपावरून खापरखेडा पोलीस ठाण्यात गुन्हा दाखल करण्यात आला आणि पोलिसांनी आरोपींचा शोध सुरू केला.
तपासादरम्यान पोलिसांनी आतापर्यंत ९ आरोपी आणि ३ विधीसंघर्ष बालकांना ताब्यात घेतले आहे. तपास पुढे नेताना आरोपींची गुन्हेगारी पार्श्वभूमी, संघटित स्वरूपाच्या गुन्हेगारी कारवायांमधील सहभाग आणि इतर संबंधित बाबींचे पोलिसांनी अवलोकन केले.
या तपासातून समोर आलेल्या बाबींच्या आधारे वरिष्ठ पोलीस अधिकाऱ्यांच्या मंजुरीनंतर संबंधित आरोपींविरोधात महाराष्ट्र संघटित गुन्हेगारी नियंत्रण अधिनियम अर्थात MCOCA अंतर्गत कलम ३(१)(ii), ३(२) आणि ३(४) अन्वये कारवाई करण्यात आली आहे.
दरम्यान, या प्रकरणातील सूरज कावळे, संघर्ष बागडे, साहिल बागडे आणि शुभम उईके हे आरोपी अद्याप फरार असून, त्यांचा शोध घेण्यासाठी पोलिसांकडून विविध पातळ्यांवर तपास सुरू आहे.
खापरखेड्यातील या गंभीर हल्ल्यानंतर पोलिसांनी MCOCAचा बडगा उगारल्याने संघटित गुन्हेगारी आणि गुन्हेगारी प्रवृत्तींविरोधात पोलिसांचा कडक पवित्रा स्पष्ट झाला आहे. फरार आरोपींना लवकरात लवकर ताब्यात घेण्यासोबतच या हल्ल्यामागील नेमकी पार्श्वभूमी आणि इतर सहभागी व्यक्तींचा तपासही पोलिसांकडून केला जात आहे.
