अकोला–नांदेड महामार्गावर भीषण अपघात; उभ्या कंटेनरवर कार आदळून ३१ वर्षीय तरुणाचा मृत्यू
मालेगावजवळ पहाटेची दुर्घटना; बेकायदेशीर पार्किंगमुळे पुन्हा गेला एका कुटुंबाचा आधार
मालेगाव (जि. वाशिम) | प्रतिनिधी
अकोला–नांदेड राष्ट्रीय महामार्गावर उभ्या असलेल्या अवजड वाहनांमुळे होणाऱ्या अपघातांची मालिका थांबण्याचे नाव घेत नसतानाच, वाशिम जिल्ह्यातील मालेगाव शहराजवळ आणखी एक भीषण अपघात घडला आहे. पहाटेच्या सुमारास भरधाव वेगातील कार महामार्गावर उभ्या असलेल्या कंटेनरच्या मागील बाजूस धडकल्याने ३१ वर्षीय तरुणाचा जागीच मृत्यू झाला. या दुर्घटनेमुळे परिसरात हळहळ व्यक्त होत असून, महामार्गावरील बेकायदेशीर पार्किंगचा प्रश्न पुन्हा एकदा ऐरणीवर आला आहे.
ही दुर्घटना मालेगाव शहराजवळील अकोला–नांदेड राष्ट्रीय महामार्गावरील एका पेट्रोल पंपासमोर घडली. वाशिमहून मालेगावमार्गे शिरपूरकडे जाणारी कार महामार्गावर उभ्या असलेल्या कंटेनरच्या मागील बाजूस भरधाव वेगाने जाऊन धडकली. धडक इतकी भीषण होती की कारचा समोरील भाग पूर्णपणे चक्काचूर झाला आणि चालक वाहनात अडकून पडला.
घटनेची माहिती मिळताच स्थानिक नागरिक आणि पोलिसांनी घटनास्थळी धाव घेत बचावकार्य सुरू केले. मोठ्या प्रयत्नांनंतर चालकाला कारमधून बाहेर काढण्यात आले. त्यानंतर त्याला तातडीने वैद्यकीय उपचारासाठी नेण्यात आले. मात्र, तपासणीअंती डॉक्टरांनी त्याला मृत घोषित केले.
या अपघातात मृत्यू झालेल्या तरुणाचे नाव दीपक लक्ष्मण भांदुर्गे (वय ३१) असे आहे. ते लग्न समारंभ आटोपून शिरपूरकडे परतत असताना हा दुर्दैवी अपघात घडला. दीपक हे आई-वडिलांचे एकुलते एक चिरंजीव आणि कुटुंबातील कर्ते सदस्य असल्याने त्यांच्या निधनाने संपूर्ण कुटुंबावर दुःखाचा डोंगर कोसळला आहे.
स्थानिक नागरिकांच्या म्हणण्यानुसार, अकोला–नांदेड महामार्गावर नियमबाह्य पद्धतीने ट्रक, कंटेनर आणि इतर अवजड वाहने उभी केली जात असल्याने यापूर्वीही अनेक गंभीर अपघात घडले आहेत. मात्र, या प्रकाराला आळा घालण्यासाठी पोलीस आणि परिवहन विभागाकडून प्रभावी कारवाई होत नसल्याचा आरोप नागरिकांनी केला आहे.
या दुर्घटनेनंतर महामार्गावरील बेकायदेशीर पार्किंगचा प्रश्न पुन्हा एकदा चर्चेत आला असून, अशा निष्काळजीपणामुळे निष्पाप नागरिकांना जीव गमवावा लागत असल्याची भावना व्यक्त होत आहे. महामार्गावर विनाकारण उभी राहणाऱ्या अवजड वाहनांवर कठोर कारवाई करून अशा दुर्घटनांना प्रतिबंध घालावा, अशी मागणी नागरिकांकडून करण्यात येत आहे.
