भरधाव बसची दुचाकीला धडक; मायलेकाला फरफटत नेले!
वैष्णोदेवी चौकाजवळ थरारक अपघात; तीन वर्षांच्या चिमुकल्यासह आई गंभीर जखमी, दोघांवर आयसीयूमध्ये उपचार
नागपूर : नागपुरात भरधाव खासगी बसने दुचाकीला दिलेल्या धडकेनंतर घडलेला प्रकार अंगावर काटा आणणारा ठरला. बसच्या चाकाखाली महिला आणि तिचा अवघा तीन वर्षांचा मुलगा अडकल्यानंतरही बस थांबली नाही. प्रत्यक्षदर्शींच्या माहितीनुसार, बसचालकाने मायलेकाला काही अंतरापर्यंत फरफटत नेले. या भीषण अपघातात मायलेक गंभीर जखमी झाले असून, दोघांवर आयसीयूमध्ये उपचार सुरू आहेत.
नागपुरातील वैष्णोदेवी चौकाजवळ बुधवारी दुपारी सुमारे एक वाजता हा थरारक अपघात झाला. दामिनी उथरा या आपल्या तीन वर्षीय मुलगा ऋषवसोबत दुचाकीवरून जात होत्या. याचवेळी संजय ट्रॅव्हल्सची खासगी बस पारडीहून घाट रोडच्या दिशेने जात होती.
सिग्नल हिरवा होताच बस पुढे निघाली. त्याचवेळी बसची दुचाकीला मागून जोरदार धडक बसली. धडकेनंतर दामिनी आणि त्यांचा तीन वर्षांचा मुलगा ऋषव बसच्या डाव्या चाकासमोर कोसळले.
अपघातानंतर दोघे बसखाली अडकल्याचे प्रत्यक्षदर्शींनी पाहिले. मात्र, आरोपानुसार बसचालकाने तत्काळ बस थांबवली नाही. त्यामुळे मायलेकाला बससोबत काही अंतरापर्यंत फरफटत जावे लागले. हा भयानक प्रकार पाहून परिसरातील नागरिकांनी आरडाओरड करत बसचा पाठलाग केला आणि अखेर चालकाला बस थांबवण्यास भाग पाडले.
अपघातात तीन वर्षीय ऋषवच्या डोक्याला गंभीर दुखापत झाली आहे. तर दामिनी यांच्या हाताला गंभीर दुखापत झाल्याची माहिती आहे. दोघांनाही उपचारासाठी रुग्णालयात दाखल करण्यात आले असून, त्यांची प्रकृती गंभीर असल्याने आयसीयूमध्ये उपचार सुरू आहेत.
घटनेची माहिती मिळताच पोलिसांनी घटनास्थळी धाव घेतली. अपघाताची नोंद करून पोलिसांनी पुढील तपास सुरू केला आहे. अपघात नेमका कशामुळे झाला, बसचा वेग किती होता, चालकाकडून कोणती चूक झाली आणि धडकेनंतर बस तातडीने का थांबवण्यात आली नाही, या सर्व बाबींचा तपास केला जात आहे.
या घटनेमुळे पुन्हा एकदा शहरातील खासगी बसचालकांच्या वाहनचालना आणि वाहतूक शिस्तीवर प्रश्न उपस्थित झाले आहेत. विशेषतः सिग्नल परिसरात वाहन चालवताना चालकांनी अधिक काळजी घेण्याची गरज या घटनेमुळे अधोरेखित झाली आहे.
तीन वर्षांचा चिमुकला आणि त्याची आई बसच्या चाकाखाली अडकले… नागरिकांनी आरडाओरड करून बस थांबवली… आणि मायलेकाला गंभीर अवस्थेत रुग्णालयात दाखल करण्यात आले. सध्या दोघांवर आयसीयूमध्ये उपचार सुरू असून, या भीषण अपघातासाठी जबाबदार असलेल्या बसचालकाविरोधात काय कारवाई होते, याकडे सर्वांचे लक्ष लागले आहे.
