विधान परिषदेत महायुतीचा दणदणीत विजय! 17 पैकी 16 जागांवर फडकला विजयाचा झेंडा
भाजपचा क्लीन स्वीप, महाविकास आघाडीचा सुपडा साफ; नाशिकमध्ये अपक्षाचा अपवाद
राज्यातील स्थानिक स्वराज्य संस्थांच्या विधान परिषद निवडणुकीत महायुतीने दणदणीत विजय मिळवत आपले राजकीय वर्चस्व पुन्हा एकदा सिद्ध केले आहे. एकूण 17 जागांपैकी तब्बल 16 जागांवर महायुतीच्या उमेदवारांनी विजयाचा झेंडा फडकावला आहे. भाजपने लढवलेल्या सर्व 10 जागांवर विजय मिळवत क्लीन स्वीप केला असून शिवसेना आणि राष्ट्रवादी काँग्रेसनेही दमदार कामगिरी केली आहे. तर नाशिकमध्ये अपक्ष उमेदवार गोकुळ गीते यांनी विजय मिळवत महायुतीला एकमेव धक्का दिला आहे.
राज्यातील स्थानिक स्वराज्य संस्थांच्या 17 विधान परिषद जागांसाठी झालेल्या निवडणुकीचे निकाल आज जाहीर झाले. मतदानापूर्वीच 6 जागांवर महायुतीचे उमेदवार बिनविरोध निवडून आले होते.
यामध्ये ठाणे मतदारसंघातून रवींद्र फाटक, कोकणातून अनिकेत तटकरे, पुण्यातून विक्रम काकडे, अहिल्यानगरमधून प्राजक्त तनपुरे, यवतमाळमधून दुष्यंत चतुर्वेदी आणि वर्धा-गडचिरोली-चंद्रपूर मतदारसंघातून अरुण लखानी यांचा समावेश होता.
उर्वरित 11 जागांसाठी 18 जून रोजी मतदान पार पडले होते. आज जाहीर झालेल्या निकालांमध्ये भाजपने सर्वाधिक यश मिळवत लढवलेल्या सर्व 10 जागांवर विजयाची नोंद केली.
अमरावती स्थानिक प्राधिकारी मतदारसंघात भाजपचे प्रवीण पोटे यांनी तब्बल 390 मते मिळवत दणदणीत विजय मिळवला. नागपूर पोटनिवडणुकीत डॉ. राजीव पोतदार विजयी झाले. तर नांदेडमध्ये अमर राजूरकर, जळगावमध्ये नंदकिशोर महाजन, सोलापुरात राजेंद्र राऊत, भंडारा-गोंदियामध्ये अविनाश ब्राम्हणकर आणि छत्रपती संभाजीनगर-जालना मतदारसंघात सुहास शिरसाट यांनी विजय संपादन केला.
शिवसेनेच्या वतीने परभणी-हिंगोली मतदारसंघातून सय्यद खान यांनी विजय मिळवला. राष्ट्रवादी काँग्रेसनेही आपल्या दोन्ही जागांवर विजयाची नोंद करत महायुतीची ताकद अधिक मजबूत केली.
या निवडणुकीतील सर्वात चर्चेचा निकाल नाशिक मतदारसंघाचा ठरला. येथे अपक्ष उमेदवार गोकुळ गीते यांनी 357 मते मिळवत विजय संपादन केला आणि महायुतीला एकमेव धक्का दिला.
एकूण निकाल पाहता महायुतीने 17 पैकी 16 जागांवर विजय मिळवत राज्यातील स्थानिक स्वराज्य संस्थांमधील आपले वर्चस्व कायम असल्याचे पुन्हा एकदा सिद्ध केले आहे. दुसरीकडे महाविकास आघाडीला एकही जागा जिंकता न आल्याने विरोधकांसाठी हा निकाल मोठा धक्का मानला जात आहे.
आगामी स्थानिक स्वराज्य संस्था, जिल्हा परिषद, नगरपालिका आणि महापालिका निवडणुकांच्या पार्श्वभूमीवर या निकालाकडे राज्याच्या राजकीय वर्तुळाचे विशेष लक्ष लागले असून, या विजयामुळे महायुतीचा आत्मविश्वास अधिक वाढल्याचे मानले जात आहे.
