अमरावतीत २३ रोपांची लागवड; विद्यार्थ्यांनी घेतली वृक्षसंवर्धनाची शपथ
व्हीएमव्ही कॉलेज परिसरात ‘आनंददायी शनिवार, दप्तरमुक्त शाळा’ उपक्रम; ९० विद्यार्थी व शिक्षकांचा सहभाग
अमरावती | प्रतिनिधी
अमरावतीच्या व्हीएमव्ही कॉलेज परिसरात वृक्षारोपणाचा उपक्रम उत्साहात पार पडला. मात्र, केवळ वृक्षारोपण करून न थांबता लावलेल्या रोपांचे संगोपन करण्याची जबाबदारीही विद्यार्थ्यांनी स्वीकारली. यावेळी विविध प्रकारच्या तब्बल २३ रोपांची लागवड करण्यात आली असून, उपस्थितांनी वृक्षसंवर्धनाची शपथ घेतली.
श्री संत गाडगेबाबा माध्यमिक विद्यामंदिर, महेंद्र कॉलनी आणि गुड मॉर्निंग व्हीएमव्ही ग्रुप यांच्या संयुक्त विद्यमाने हा उपक्रम आयोजित करण्यात आला. ‘आनंददायी शनिवार’ आणि ‘दप्तरमुक्त शाळा’ या उपक्रमांतर्गत व्हीएमव्ही कॉलेजच्या प्रांगणात विविध प्रजातींच्या २३ रोपांची लागवड करण्यात आली.
या उपक्रमात सुमारे ९० विद्यार्थी आणि शिक्षकांनी सहभाग घेतला. विद्यार्थ्यांमध्ये पर्यावरण संरक्षणाबाबत जनजागृती करण्यासोबतच लावलेल्या प्रत्येक रोपट्याची नियमित काळजी घेण्याची शपथ यावेळी घेण्यात आली.
वृक्षारोपणाच्या वेळी फोटोसेशन आणि प्रसिद्धीपेक्षा त्यानंतर रोपांचे संगोपन करणे अधिक महत्त्वाचे असल्याचा संदेश यावेळी देण्यात आला. लावलेले रोपटे जगले, त्याची योग्य वाढ झाली आणि ते भविष्यात मोठे झाड बनले, तरच वृक्षारोपणाचा खरा उद्देश साध्य होईल, यावर भर देण्यात आला.
दरवर्षी मोठ्या उत्साहात वृक्षारोपणाचे उपक्रम आयोजित केले जातात. मात्र, वृक्षसंवर्धनाची जबाबदारी सातत्याने पार पाडली तरच पर्यावरण संवर्धनाला खऱ्या अर्थाने बळ मिळू शकते. विद्यार्थ्यांनी स्वीकारलेली ही जबाबदारी पर्यावरण संरक्षणाच्या दृष्टीने निश्चितच सकारात्मक पाऊल ठरणार आहे.
