सावळी फाट्याजवळ इंदूर-हैदराबाद व्हॉल्वो ट्रॅव्हल्स पलटी; सहा प्रवासी जखमी!
पहाटे २.१० वाजताच्या सुमारास NH-47 महामार्गावर अपघात; हितेश बनसोड यांच्यासह केळवद पोलिसांची तत्परता, खासगी ॲम्ब्युलन्समधून जखमींना रुग्णालयात हलविले
सावनेर, दि. १० नोव्हेंबर : नागपूर जिल्ह्यातील सावनेर तालुक्यातील सावळी फाट्याजवळ इंदूरहून हैदराबादकडे जाणारी इंटरसिटी कंपनीची व्हॉल्वो ट्रॅव्हल्स पलटी झाल्याने भीषण अपघात घडला. मंगळवारी पहाटे सुमारे २.१० वाजताच्या दरम्यान NH-47 बैतूल-सावनेर महामार्गावरील जैतपूर-सावळी शिवारात हा अपघात झाला. या दुर्घटनेत सहा प्रवासी जखमी झाले असून, सुदैवाने मोठी जीवितहानी टळली. अपघाताची माहिती मिळताच केळवद पोलीस आणि महामार्ग पोलिसांनी तातडीने घटनास्थळी धाव घेत बचावकार्य सुरू केले. सामाजिक कार्यकर्ते हितेश बनसोड यांनीही स्वतःच्या खासगी ॲम्ब्युलन्समधून जखमींना रुग्णालयात पोहोचविण्यासाठी महत्त्वाची मदत केली.
मिळालेल्या माहितीनुसार, MP09 BL 9090 क्रमांकाची ही व्हॉल्वो ट्रॅव्हल्स इंदूर येथून २९ प्रवाशांना घेऊन हैदराबादच्या दिशेने जात होती. पहाटेच्या सुमारास सावळी शिवारातील वळणावर ट्रॅव्हल्स चालकाने समोरून जात असलेल्या ट्रकला ओव्हरटेक करण्याचा प्रयत्न केला. याचवेळी चालकाचे वाहनावरील नियंत्रण सुटल्याने ट्रॅव्हल्स रस्त्याच्या खाली जाऊन पलटी झाली असावी, असा प्राथमिक अंदाज व्यक्त करण्यात येत आहे. अचानक घडलेल्या या अपघातामुळे बसमधील प्रवाशांमध्ये एकच घबराट उडाली.
या अपघातात सहा प्रवाशांना किरकोळ दुखापती झाल्या. जखमींमध्ये सुनिता केदारसिंग वर्मा (४५, इंदूर), रामसिंग सिताराम राजपूत (४४, महू), आयुष शर्मा (२४, भोपाळ), जमाल पठाण (१८, गोंडा) आणि मोहम्मद शहबाज (२२, गोंडा, उत्तर प्रदेश) यांचा समावेश आहे. सहाव्या जखमी प्रवाशाचे नाव अद्याप समजू शकलेले नाही.
अपघाताची माहिती मिळताच केळवद पोलीस आणि महामार्ग पोलीस पथकाने घटनास्थळी पोहोचून मदतकार्य सुरू केले. यावेळी सामाजिक कार्यकर्ते हितेश बनसोड यांनी स्वतःची खासगी ॲम्ब्युलन्स उपलब्ध करून देत सर्व सहा जखमी प्रवाशांना उपचारासाठी सावनेर येथील प्राथमिक आरोग्य केंद्रात हलविले. तेथे जखमींवर प्राथमिक उपचार करण्यात आले. दरम्यान, अपघातग्रस्त ट्रॅव्हल्समधील इतर प्रवाशांचीही सुरक्षितता सुनिश्चित करण्यात आली. त्यानंतर उर्वरित प्रवाशांना दुसऱ्या हंस ट्रॅव्हल्सच्या माध्यमातून हैदराबादकडे रवाना करण्यात आले.
या बचाव व मदतकार्यात केळवद पोलीस ठाण्याचे ठाणेदार आशिष सिंग ठाकूर, महामार्ग पोलीस API श्रीकांत कोळी, पोलीस कर्मचारी नितेश परखड, दिनेश काकडे यांच्यासह हितज्योती आधार फाउंडेशनचे टीम मेंबर राजेश सिंदेवार आणि आकाश यादव यांनी महत्त्वाची भूमिका बजावली. पोलिसांनी अपघातस्थळी वाहतूक व्यवस्था सुरळीत करून महामार्गावरील वाहतूक पूर्ववत केली.
दरम्यान, प्राथमिक माहितीनुसार ट्रकला ओव्हरटेक करताना चालकाचे वाहनावरील नियंत्रण सुटल्याने हा अपघात घडल्याची शक्यता आहे. मात्र, अपघाताचे नेमके कारण तपासानंतरच स्पष्ट होणार असून, याप्रकरणी केळवद पोलीस पुढील तपास करीत आहेत.
संकटकाळात पोलिसांसह सामाजिक कार्यकर्त्यांनी दाखविलेल्या तत्परतेमुळे जखमी प्रवाशांना वेळेत वैद्यकीय मदत मिळाली.
