अमरावतीत एसटी बस उलटली; १० प्रवासी जखमी, धोत्रा-सालोरा मार्गावरील अपघाताने खळबळ!
खराब रस्त्यामुळे ब्रेक निकामी झाल्याची प्राथमिक माहिती; २० ते २५ प्रवासी होते बसमध्ये, जखमींना जिल्हा सामान्य रुग्णालयात हलविले
अमरावती ब्रेकिंग
अमरावती : अमरावती जिल्ह्यात धोत्रा ते सालोरा मार्गावर एसटी बस उलटून अपघात झाल्याची घटना समोर आली आहे. खराब रस्त्यामुळे बसचे ब्रेक निकामी झाल्याने चालकाचे वाहनावरील नियंत्रण सुटले आणि बस रस्त्यावर उलटली. या अपघातात सुमारे १० प्रवासी किरकोळ जखमी झाले असून, त्यांना उपचारासाठी अमरावतीच्या जिल्हा सामान्य रुग्णालयात दाखल करण्यात आले आहे.
मिळालेल्या प्राथमिक माहितीनुसार, शिरसगाव मोझरी येथून अमरावती शहराच्या दिशेने ही एसटी बस येत होती. धोत्रा ते सालोरा मार्गावरून प्रवास सुरू असताना बसचे ब्रेक निकामी झाल्याचे सांगण्यात येत आहे. त्यामुळे बस अनियंत्रित होऊन रस्त्यावर उलटली. अपघाताच्या वेळी बसमध्ये अंदाजे २० ते २५ प्रवासी प्रवास करीत होते.
या अपघातात दहा प्रवाशांना किरकोळ दुखापत झाली. घटनेनंतर जखमी प्रवाशांना तातडीने उपचारासाठी जिल्हा सामान्य रुग्णालयात हलविण्यात आले. अपघाताची माहिती मिळताच परिसरात खळबळ उडाली.
दरम्यान, खराब रस्ते आणि वाहनांच्या सुरक्षिततेचा प्रश्न या अपघातामुळे पुन्हा ऐरणीवर आला आहे. रस्त्यांची दुरवस्था आणि बसचे ब्रेक निकामी होण्यामागील नेमके कारण याबाबत अधिकृत तपासानंतरच स्पष्ट होणार आहे.
रस्त्यांच्या दुरवस्थेमुळे प्रवाशांचा जीव धोक्यात येत असेल, तर संबंधित यंत्रणा जबाबदारी कधी स्वीकारणार, असा सवाल या घटनेनंतर उपस्थित होत आहे.
