NEET पेपरफुटीचा तपास नांदेडपर्यंत; 100 गुणांवरून 560 गुणांचा संशय, CBIची 8 तास झाडाझडती
नांदेड : देशभरात खळबळ उडवून देणाऱ्या NEET-UG पेपरफुटी प्रकरणाचे धागेदोरे आता महाराष्ट्रातील नांदेडपर्यंत पोहोचले आहेत. लातूरमधील चौकशीनंतर केंद्रीय अन्वेषण विभागाच्या (CBI) विशेष पथकाने शनिवारी नांदेड शहरातील विद्युतनगर परिसरातील एका कुटुंबाच्या घरावर तब्बल आठ तास झाडाझडती घेत तपास केला. या कारवाईमुळे शिक्षण क्षेत्रात पुन्हा एकदा खळबळ उडाली आहे.
पाच लाखांत प्रश्नपत्रिका खरेदी केल्याचा संशय
तपासाशी संबंधित सूत्रांच्या माहितीनुसार, संबंधित विद्यार्थिनीच्या कुटुंबाने NEET परीक्षेची प्रश्नपत्रिका मिळवण्यासाठी सुमारे पाच लाख रुपये दिल्याचा संशय व्यक्त केला जात आहे. याच अनुषंगाने CBIने घरातील कागदपत्रे, मोबाईल फोन, इलेक्ट्रॉनिक उपकरणे आणि आर्थिक व्यवहारांशी संबंधित माहितीची तपासणी केली.
100-120 गुणांवरून थेट 560 गुण
या प्रकरणातील सर्वात महत्त्वाचा मुद्दा म्हणजे संबंधित विद्यार्थिनीची गुणांमध्ये झालेली अचानक वाढ. नांदेडमध्ये तयारी करत असताना विद्यार्थिनीला सरासरी 100 ते 120 गुण मिळत असल्याचे सांगितले जाते. मात्र नंतर ती आपल्या आईसोबत पुण्यात सुमारे 15 दिवस राहिल्याची माहिती समोर आली. त्यानंतर झालेल्या NEET परीक्षेत तिला थेट 560 गुण मिळाल्याने तपास यंत्रणांचा संशय अधिक गडद झाला आहे.
पुण्यातील मुक्कामावर तपासाचा भर
पुण्यातील 15 दिवसांच्या वास्तव्यात नेमके कोणाशी संपर्क झाला, कोणते व्यवहार झाले आणि या कालावधीत पेपरफुटी रॅकेटशी संबंध आला का, याचा CBIकडून सखोल तपास केला जात आहे.
लातूरनंतर नांदेडमध्ये CBIची कारवाई
या प्रकरणात यापूर्वी लातूरमधील एका कोचिंग क्लास चालकाची चौकशी करण्यात आली होती. त्यानंतर तपासाचे धागेदोरे नांदेडपर्यंत पोहोचले. विद्युतनगर परिसरातील झाडाझडतीमुळे स्थानिक पातळीवर मोठी चर्चा रंगली आहे.
अद्याप अटक नाही
या कारवाईदरम्यान कोणालाही अटक करण्यात आलेली नसली, तरी तपास यंत्रणा महत्त्वाचे पुरावे गोळा करत असल्याची माहिती समोर येत आहे. पुढील तपासानुसार आणखी काही धक्कादायक खुलासे होण्याची शक्यता वर्तवली जात आहे.
शिक्षण व्यवस्थेवर पुन्हा प्रश्नचिन्ह
देशभरातील लाखो विद्यार्थ्यांच्या भविष्याशी संबंधित असलेल्या NEET परीक्षेतील कथित गैरप्रकारामुळे शिक्षण व्यवस्थेच्या पारदर्शकतेवर गंभीर प्रश्नचिन्ह निर्माण झाले आहे.
100 गुणांवरून थेट 560 गुण… पाच लाखांचा कथित व्यवहार… पुण्यातील संशयास्पद हालचाली… आणि आता नांदेडमध्ये CBIची धडक कारवाई…
या प्रकरणातून आणखी कोणती मोठी नावे समोर येतात, याकडे संपूर्ण राज्याचे लक्ष लागले आहे.
