अमरावतीत चोरट्यांचा पुन्हा धुमाकूळ; गाडगेनगरमध्ये दुकान फोडून 20 हजारांचा माल लंपास
अमरावती शहरात चोरीच्या घटनांमध्ये वाढ होत असल्याचे चित्र दिसत आहे. गाडगेनगर पोलीस ठाण्याच्या हद्दीतील साहू बाग परिसरात अज्ञात चोरट्यांनी एका दुकानाचे शटर फोडून अंदाजे 18 ते 20 हजार रुपयांचा माल चोरून नेल्याची घटना समोर आली आहे.
मिळालेल्या माहितीनुसार, द्वारका नगरजवळील या दुकानाला मध्यरात्रीच्या सुमारास लक्ष्य करण्यात आले. चोरट्यांनी दुकानाचे शटर फोडून आत प्रवेश केला आणि रोख रक्कम व इतर वस्तूंसह हजारो रुपयांचा माल लंपास केला.
सकाळी दुकान उघडण्यासाठी आलेल्या मालकाच्या लक्षात हा प्रकार आला. शटर तुटलेले आणि दुकानातील सामान अस्ताव्यस्त पाहून त्यांनी तात्काळ पोलिसांना माहिती दिली. या घटनेनंतर परिसरात खळबळ उडाली.
माहिती मिळताच गाडगेनगर पोलिसांनी घटनास्थळी धाव घेत पंचनामा केला आणि तपास सुरू केला. परिसरातील सीसीटीव्ही फुटेजच्या आधारे चोरट्यांचा माग काढण्याचे काम सुरू असल्याची माहिती पोलिसांनी दिली.
अमरावती शहरात गेल्या काही दिवसांत घरफोडी आणि चोरीच्या घटनांमध्ये वाढ झाल्याने नागरिकांमध्ये भीतीचे वातावरण निर्माण झाले आहे. रात्रीच्या वेळी पोलिस गस्त वाढवण्याची मागणी स्थानिक नागरिकांकडून करण्यात येत आहे.
या प्रकरणातील आरोपींचा शोध सुरू असून, तपासातून आणखी माहिती समोर येण्याची शक्यता आहे.
