मेच्या पहिल्याच दिवशी सोन्याला झटका! सराफा बाजारात दर कोसळले, ग्राहकांना दिलासा

मे महिन्याच्या सुरुवातीलाच सोन्याच्या दरात मोठी घसरण नोंदवण्यात आली असून, गेल्या काही दिवसांपासून सातत्याने वाढणाऱ्या किमतींना अखेर ब्रेक लागला आहे. आज सराफा बाजार उघडताच १८ कॅरेट, २२ कॅरेट आणि २४ कॅरेट सोन्याच्या दरात लक्षणीय घट दिसून आली आहे. यामुळे ग्राहकांना काहीसा दिलासा मिळाला आहे.

Goodreturns च्या माहितीनुसार, २४ कॅरेट सोन्याच्या दरात प्रति तोळा तब्बल ₹३८० ने घट झाली आहे. त्यामुळे आज १० ग्रॅम (१ तोळा) सोन्याचा भाव ₹१,५२,३५० वर आला आहे. प्रति ग्रॅम दर ₹१५,२३५ इतका नोंदवला गेला आहे.

२२ कॅरेट सोन्याच्या दरातही प्रति ग्रॅम ₹३५ ने घसरण झाली असून दर ₹१३,९६५ वर पोहोचला आहे. तर १८ कॅरेट सोन्याचा भाव प्रति ग्रॅम ₹११,४२६ इतका झाला आहे.

दरातील घट सर्वच वजनांमध्ये दिसून आली आहे. २४ कॅरेट सोन्याच्या १०० ग्रॅमसाठी आता ₹१५,२३,५०० मोजावे लागणार असून, कालच्या तुलनेत ₹३,८०० ची कपात झाली आहे.

देशातील प्रमुख शहरांमध्येही सोन्याचे दर घसरले आहेत. मुंबई, पुणे आणि बेंगळुरू येथे २४ कॅरेट सोन्याचा दर ₹१५,२३५ प्रति ग्रॅम आहे. दिल्ली मध्ये हा दर ₹१५,२५०, तर चेन्नई मध्ये ₹१५,३२८ इतका आहे.

तज्ज्ञांच्या मते, आंतरराष्ट्रीय बाजारातील हालचाली, डॉलरच्या किमतीतील बदल आणि गुंतवणूकदारांच्या बदलत्या धोरणांमुळे सोन्याच्या दरात ही घसरण झाली आहे. पुढील काही दिवसांत बाजारातील परिस्थितीनुसार दरात आणखी चढ-उतार होण्याची शक्यता वर्तवली जात आहे.